الجمعة، 9 يوليو 2010

احلى من الشرف اللحمه


كما قال الشاعر الموقر والمبجل توفيق الدقن بصوته المرعب والاجش والغريب فى نفس الوقت فى مقولته الشهيرة
احلى من الشرف مفيييييييييييييش .......... يااه يا ااااااه
وكما نحن عارفين ومدركين ان الشرف كان مثل عود الكبريت مبيولعش الا مرة واحده وممكن يولع تانى لو حطينا العود على البوتجاز او على لمبة الجاااااااااااااااز
اما حاليا الشرف مثل الولاااااعة بيولع خمسميت مرة ولما الغاز بيخلص ممكن نملا الولاعة تانى من عند بتاع الولاعات اللى على اول الشارع
بمناسبة هذا الكلام وهذا الحوار احب اقووووووووول واحب ااعلن"حلوة أ أعلن دى" عجبانى اوووى
ايوة نكمل بقى
احب اخبركووووووووو
انى اكتر وحده بتضرب اساااااااافين
والاسافين جمع اسفين
والاسفين ده نوع من انواع البرشام المؤدى الى هلاك الصحة مثل الترامادووول والفياكترا والحاجات دى
المهند بقى
ولله الحمد بالى طووويل جدا بس لكل بنى ادم طاقة و الطاقة يعنى اينرجى"ENERGY"والاينرجى دى ليها نهايه يعنى ايند"END"
ودلوقتى طبعا احنا ماشيين واحده واحده اهوو وبنتعلم كل يوم كلمتين وذلك لتقوية الناس فى اللغة الاجنبيه
وكما علمتم ان الاجانب كلهم دخلو كاس العالم والمانيا للاسف طلعتها اسبانيا
واسبانيا هى اللى هتاخد الكاس بس هولندا مش سهله
ايه الهبل ده
ماعلينا
كله على كله لما تشوفه قووووله
قولوووووووووو
قولوووووووووو
طبعا فى النهاية كلكو مستغربين طريقة الكلام العجيبة والغريبة دى يعنى استراااااانج "STRANGE" وعاوزين تعرفووو ماذا حصل"WHAT'S THE MATAR"
كل اللى حصل انى بتأسفن فى الشغل ولامؤاخذه باخد فى ضرب من تحت لتحت عشان ايه بقى
معرفش
عشان مفيش ضمير
ومفيش شرف
ومفيش لحمة
ولا كبده
والفراخ ماتتتت
وكل سنة وانتو طيبين ورمضان كريم الله اكرم بعده العيد نلبس جديد
ومع السلامو عليكووووووووووووو
مع تحيات اخوكوووو اللمبى اللى بحب انصح كل شاب وكل فيتاه
لاتنحرف ولو اتاسفنت فى الشغل بوس ايد مديرك شعر ودقن وخد على افاك منه وقولو كمان

هناك 36 تعليقًا:

نظره عين يقول...

عاوزه رأيى بصراحه ياأختى المبجله تحياتى ليكى ولتهيسك واسفينك ده اولا
ثانيا ياموووووووووووزه لما تتأسفنى لازم تعملى ايه تتعلمى من اسفينك ده
ثالثا ايه يابنت لهجتك دى انا حاسه انى قاعده ع العتبه وبسمع كلام اخر زمن حلو الحوار بس كلام ناس متأسفنه اخر حاجه
وفى الاخر ربنا ياخد مديرك ويولع فى شركتكم دى ولا مصنعكم لو فى ظلم وافترى
يلا ربنا معاكى بس حاسبى الاسفييييييييين

نظره عين يقول...

صحييييييييييييييييييييح نسيت اول مرور انااااااااا زى مابتعملوا وبتقولواااااااااا لولولولولوللللللللىىىىىى صوتى يامتأسفنه

Ramy يقول...

شوفى بقى الحياة منغير اسفنة متبقاش حياة اة اة

يعنى فى فرق للحياة قبل الأسفين و بعد الأسفين

قبل الأسفين انتى فاهمة كل الناس طيبة و حلوين

بعد الأسفين الحقيقة بتبتدى تظهر
وغالبا الناس بتبان

طبعا احنا بنتعب من حاجتين الأولى اللى هى الأسفين طبعا
التانية ان احنا معرفناش نقدر الناس صح

ربنا يحمينا جميعا من الأسافين والمؤسفنين

على فكرة كل اللى قولتية فى البوست دة
من تأثير الأسفين هتزول مع الوقت (:

ربنا يوفقك و يكون معاكى

متغبيش قوى كدة (:

essameldin يقول...

حمد لله على السلامه يابلدياتى

كان نفسى اعلق عندك بس خايف حد يعاقبك علشان تعليقاتى عندك
يارب تكونى بخير
تحياتى

أتنين حبيبين يقول...

وحشتينى حبيبتى
يارب يسعدك ويوفقك يارب ويكرمك خير ويطمنى عليكى بحبك اوى بجميع حالالالالالالالالالالالاتك

أتنين حبيبين يقول...

بصى عبير حبيبتى

أحنا أتكلمنا بالموضوع ده وطبعآ ولاد الحرام كتير أوووى
وحسبى الله ونعمه الوكيل
وأنتى معروفه كويس
وإن شاء الله اللى عملك كده أنا أول وحده بدعى عليهم من قلبى
لأنى دمى محروق أووووى عشانك حبييبتى

حسبى الله ونعمه الوكيل
حسبى الله ونعمه الوكيل
متزعليش ياقلبى ربك هيعوضك خير
وقريب أوووووووووووووووووووى

غير معرف يقول...

موجه

مش تزعلى ربنا هينصرك طالما انتى صح
وطنشى اى حد يضيقك ومش تحطى فى دماغك

ربنا يوفقك ويكرمك كل خير

بس عايزه اقولك حاجه

انتى عسوووووله اوى فى طريقة سردك للبوست

ربنا يسعد ايامك

دمتى بخير وحب

داليـ ـ ـ ـ ـ ـ ــــا يقول...

بصى انا زيك بالظبط

انا فى شغلى كده بس معرفش ليه بيحصل معايا كده

وانا شايفه انك مكبره ومنفضه وضاربها جزمه اديمه

المهم ياباشا انى اطمنت عليكى
وانك بخير
اسفين بقه مش اسفين المهم انك بخير

تحياتى يابت ياعبوره

amirelhob يقول...

واضح ان موضوع لاسفين دا اتحول من خبر الى عاده لازم نعملها فى بعض حتى لو مش هتعود علينا بفايده لازم نعملها بقت حاجه فى دم كتير مننا عشان تعرفى تعيشى وسط الناس دى مش هقولك اضربى انتى كمان اسافين بس اعرفى الضربه جايه منين ورديها مش تقفى محلك سرك

ربنا يوفقك وتقدرى تصدى اكبر عدد من الاسافين

وربنا يوفقك وبتمنلك كل خير وسعاده وصحه وتوفيق وفرح و ابتسامه تدوم يا رب طول العمر ويا ريت تقبلى مرورى

amirelhob يقول...

واضح ان موضوع لاسفين دا اتحول من خبر الى عاده لازم نعملها فى بعض حتى لو مش هتعود علينا بفايده لازم نعملها بقت حاجه فى دم كتير مننا عشان تعرفى تعيشى وسط الناس دى مش هقولك اضربى انتى كمان اسافين بس اعرفى الضربه جايه منين ورديها مش تقفى محلك سرك

ربنا يوفقك وتقدرى تصدى اكبر عدد من الاسافين

وربنا يوفقك وبتمنلك كل خير وسعاده وصحه وتوفيق وفرح و ابتسامه تدوم يا رب طول العمر ويا ريت تقبلى مرورى

amirelhob يقول...
أزال المؤلف هذا التعليق.
mrmr يقول...

من حفر حفره لاخيه وقع فيه
انتى بتحبى تعملى اسافين
( دى جمع اسفين )
وقعت ياموووزه فى اسفل السافلين
بلاش تعملى اسفين فى حد وامشى تحت الحيطه

ياللا كفايكى كده
اوعى تزعلى
ربنا معاكى ويبعد عنك ولاد الحرام
( اقصد اسافين الموظفين )


اااااااااه
جيتى على الوجعه انا بعانى من الاسافين دى كتير بس انا غلبااااان على راى عادل امام

موجة يقول...

لولولولوولولولولولولولىىىىىىىىى
اختىىىىىى نجحت
اخيرااااااااااااا
هرد على تعليقات البوست تانى انشاء الله
بس الحمد لله فى فرحة دخلت قلبى لما اختى نجحت
الحمد لله

غير معرف يقول...

الف مليون مبرررررررروك ياموجه لأختك
بس مش قولتنا جابت كاااااااام؟
مبعرفش ازغرط بس
لولولىىىىىىىىىىىىىىىىىى

ههههههههههههه

معليش بقا على ادى

دمتى بخير وحب

موجة يقول...

نظرة عين
___________
والله يا بنتى اقصد يا اختى انتى جبتى المفيد
ربنا ياخد مديرى ويولع فى شركتنا دى

موجة يقول...

RAMY
_____
اشكرك يا رامى بجد
وفعلا عندك حق الحياه قبل الاسفين بتختلف عنها بعد الاسفين
وبعدين اتمنى ان تاثير الاسفين يزوول بسرعة
منورنى دايما

موجة يقول...

essameldin
___________
ى ما وضحت لك يا عصام فى تعليقى عندك
محدش بيعمل كنترول على تعليق حد

موجة يقول...

اتنين حبيبين
_____________
انتى كمان ياروحى وحشانى موووت
وادعى على اللى بياذى الناس من غير مناسبة
وفعلا حسبى ربى

موجة يقول...

الحب الجميل
__________
حبيبة قلبى صاحبة الحب الجميل
ربنا يخليكى ليا ويخلي ليا سؤالك عليا
وانا كمان عاوزة اقولك حاجة
انتى اعسسسسسسسسسسل

موجة يقول...

داليــــــــــا
__________________
حبيبتى الامورة الجميله المتاسفنة زيي
ايوة كده
طالما بتاخدى اسافين زيي يبقى انت كده صحبى وحبيبى وكفاءة
بس عادى اضربيها جزمة وارمة(جايه من فعل ورم)
ونوبروبلم اينى وااااى

موجة يقول...

amirelhob
___________
نورت مدونتى المتواضعة واشكرك جدا على زوقك فى الكلام
ويارب يعنى ويعن كل المتاسفنين انهم ياسفنو اللى بياسفنوهم
وشكرا لحسن استماعكم لنا والسلامو عليكم ورحمة الله وبركاتة
كاننا فى اذاعة المدرسة بقى وبتاع
نورتنىىىىىىىى

موجة يقول...

mrmr
_______
والله ما عملت حاجة
برئ يابيه
ولو ولو
برييييييييئ يابيه
عمرى عمرى ما ضربت اسافين ابدا فى حياتى طول عمرى
بس الحمد لله على السراء والضراء

موجة يقول...

الحب الجميل
___________
حبيبيتى
ربنا ما يحرمنى منك بجد
انتى اختى وحبيبتى
مبروووك لكل الناجحين
بس اختى فى سنة اولى كليه يعنى جابت تقدير جيد بقى على اد حالها
يلا السنة الجاية تتعوض
ميرسى لمشاركتك فرحى وهمى ياروح قلبى

أتنين حبيبين يقول...

يارب تكونى بقيتى احسن من الاول

قلبى معاكى

Humman being يقول...

عااااااادى يا حبيبتى جدا... مالك مستغربة ليه... أنا لو فات يوم عليا فى الشغل ومأخدتش الاسفين التمام بحس ان فى حاجة غلط.. بحس انى اتنقلت شركة تانية....

ويا سلام بقة لما بيبقى الاسفين جايلك من حد لسة دلوقتى حالا قايلك صباح الخير ...منورة... ده الشركة كانت مضلمة يومين الأجازة دول.... وهووووووووووووووووب يدور وشه ويتكلم عليكى... عااااااااادى يا ماما..ده الطبيعى
كبرى دماغك

موجة يقول...

مبروك لاختك ياعبير
خالص تحياتي
موجة

لــــ زهــــــراء ــــولا يقول...

الله يكون ف العون يا فندم وميوقفش قدامك حاكم ظالم..العصر بيدن بشرة خير
لولا

غير معرف يقول...

دعوه عامه للتجمع فى الاسكندريه

ودعوه خاصه ليكى
البوست موجود فى المدونه
الحب الجميل

علاء المصرى يقول...

شكلك من مصر عشان الموضوع دة منتشر عندنا قوى
سلالالالام
أبقى عدى

موجة يقول...

اتنين حبيبن
_____________
حبيبتى ربنا ما يحرمنى منك ولا من سؤالك عليا

موجة يقول...

SHAIMAA
_________
والله يا اختى الدنيا كلها بقيت ماشية على كده
لكن ياريت الاسفنة اللى انا اتكلمت عليها كانت على اد الكلام اللى مش فى الوش وبس لكن فى اسافين تودى فى دهية وتأذى ناس فى شغلها وتكون سبب فى قطع عيشها
نورتنى

موجة يقول...

موجة
_________
الله يبارك فيك يا موجة
عقبال اختك انت كمان بس يارب ما يطلعش اسمها زى اسم اختى عشان تبقى كملت وساعتها مش هتنازل عن اسم اختىىى
نورت

موجة يقول...

لولا وزهرة
___________
حلو اوووى الدعاء ده
نورتى

موجة يقول...

الحب الجميل
_____________
يارب اقدر اجى بجد يا حب يااااااااااارب

موجة يقول...

علاء المصرى اليوم
_________________
صدق اه
انا فعلا من مصر
سلاااااام وابقى عدى

التميز المثالي للخدمات المنزلية يقول...


شركة تاج للتنظيف بالدمام 0551844053


شركة مكافحة حشرات بالدمام

شركة رش مبيدات بالدمام

شركة تنظيف بالدمام


شركة تنظيف شقق بالدمام


شركة تنظيف فلل بالدمام


شركة رش مبيدات بالخبر


شركة مكافحة حشرات بالخبر



شركة تنظيف شقق بالخبر


شركة تنظيف سجاد بالدمام


شركة مكافحة حشرات بالاحساء

شركة مكافحة النمل الابيض بالاحساء


شركة مكافحة حشرات بالجبيل

شركة مكافحة النمل الابيض بالجبيل


شركة تنظيف منازل بالجبيل

شركة رش دفان بالدمام

شركة مكافحة النمل الابيض بالدمام