الثلاثاء، 28 أبريل 2009

ممنوع الدخول الا لطلبة بكالريوس

من يوم 25/4/2009

عملت حاجة حلوة اوى


ال ايه بقى بستعد للامتحانات

ونفسية الواحد ال يعنى مدمرة ومش متحملة حد يفتح بقة معايا


قووم ايه


رحت جايبة ورقة خضرا من الورق بتاع اللوح ده

والورقة دى كانت عندى من بواقى شغل فى الكلية

خنصرتها وقلت استغلها فى حاجة مفيدة


ورحت جايبة قلم اسود سبورة

وقلت اكتب فى اللوحة دى حاجة تخلى اللى يشوفنى ميتكلمش

رحت كاتبة


ممنوع الدخول لغير طلبة بكالريوس لمدة لاتقل عن ثلاثة شهور من تاريخ اليوم


ورحت معلقاها على باب الاوضة بتاعتى

وقلت بس كدة

تلكيكة حلوة

عشان اللى يدخل

افش غلى فية بقى

والحجة موجودة

انا معلقة يافطة


وفعلا


اللوحة دى عملت احلى شغل

بقيت اقفل باب الاوضة بتاعتى

ومحدش هيقدر يهوب ناحيتها

بس هو لمدة يومين اتنين بس


وبعدها


راح بابا شايل اللوحة

وقالى

ايه ياختى اللى انتى حاطاه ده

رحت ردة علية قايلالة

يابابا بقى

متسيبها

قال طيب

ماشى انا مش هكسر بخاطرك

بس ابقى شوفى مين هينفذ اللى فيها

قلت لة يابابا ده مكتوب لكل الناس

الا انت ياحبيبى

قالى ماشى

ان كان كدة ماشى


ورحت معلقاها تانى

تيجى ماماا

يدور نفس الحوار

ياماما كلة الا انتى ياحبيبتى

ده الكلام ده مش ليكى


وتتعلق اللوحة

على باب الاوضة

ويتبدل حالها


بدل ممنوع الدخول الا لطلبة بكالريوس


بقى ممنوع دخول طلبة بكالريوس

وخصوصا انا


ودى بقى حكايتى مع اللوحة

وارجوكو ياجماعة

ادعولى بشدة انا واللى زيي

عشان الايام دى

بجد ربنا يعلم بحالنا

ميرسى ليكو كلكو متشكرة على دعواتكو مقدما

السبت، 18 أبريل 2009

بتحبنى........هههه ضحكتنى

بصراحة كده ده بوست كنت منزلاه من زمان كده يجي تسع عشر عشرين شهر ولما قريته حبيت انى استرجعه تانى ونقراه مع بعض سوا سوا
قالى بحبك ............. قلت لة بامارة ايه
قالى سهران الليل..............قلت له ليه
قالى يابنتى حسى بقى........... قلت له طيب اعمل ايه
قالى فكرى فيا..........قلت له بصفتك ايه
قالى بصفتى حبيبك.............. قلت له ميحكمش عليك
قالى اجى اخطبك.................قلت له تشرف يابية
قالى اقابل باباكى امتة.............. قلت لة ده رقمة واتصل بيه
قالى باباكى لذيذ كدة ومتفاهم.............قلت له روح كلمة واتعرف عليه
قالى هكلمة عشان خطرك.............. قلت لة ورينى هتعمل ايه
قالى هتحمل منة كل حاجة...............قلت له ياريت تقدر تاثر فية
قالى باباكى طلباتة اوامر............... قلت له بابا لو حبك هيشتريك
قالى نفسى ومنى عينى باباكى يرضى عنى...............قلت لة باخلاقك وادبك بابا هيراضيك
قالى هتكونى موجودة يوم ماهقابلة...........قلت له لاء ميصحش ده كدة عيب
قالى اتصلت بيه مردش...............قلت لة متصلتش تانى ليه
قالى الشبكة باينها واقعة...............قلت له كلمة ع تليفون البيت
قالى طب اكلمة وانت معايا...........قلت له طب انا جاية ليك
قالى تعالى ياحبيبتى انا هنا...............قلت لة عشر دقايق واكون قدام عينيك
قالى وحشتينى وبحبك كتير...........قلت له يلا بقى نكلم بابا ونقولة المفيد
قالى ماتيجى نشرب حاجة...............قلت لة عاوزة كنز كبير
قالى عيونى ليكى................قلت لة ربنا يخليك
قالى بحبك اوى.............قلت لة وانا بموت فيك
قالى ممكن امسك ايدك..............قلت لة.... يوة ...... متكسفنيش
قالى عشان خطرى................قلت لة بس بقى يابن الايه
قالى هقولك على حاجة.............قلت له خير
قالى بس توعدينى انك هتسمحينى..............قلت لة خير اللهم اجعلة خير
قالى انا مقدرش استغنى عنك...........قلت له كمل انا بستمع ليك
قالى ماما جايبالى عروسة...............قلت لة طب وانا ابقى ايه
قالى مانا مش عارف اقول لماما عليكى..............قلت له هو انا كوخة ولا ايه
قالى اصل العروسة تبقى بنت صحبتها..........قلت له تشرفنا ياسعت البية
قالى طب انا هروح معاهم بكرة عشان اشوفها.............قلت لة وجيت تقابلنى ليه
قالى انا بحبك.............قلت له
هيههيههيهههههههههىىىىىى
قالى انا هاهودهم واروح معاهم.............قلت لة انسانى وامشى من قدامى
قالى مش هسيبك ابدا................قلت له بقولك ابعد عنى وانسانى
واهجرنى وبلاش تترجانى.............حرام عليك ضيعت احلامى
ولسة جاى تقولى بحبك..................بتحبنى..........ههئئ........ضحكتنى

ملحوظة مهمة جدا جدا
الشاب من دول لما يلاقى البنت مالهاش فى سكة بحبك ووحشتينى يروح قايلها انا هتقدملك عشان اخطبك وتبقى بتاعتى ويكون مالكيش حجة
تروح البنت تفهم انة شاريها بقى ومش هيقدر يعيش غير ليها
لكن الواد اول ما يلاقى الموضوع دخل فى الجد وتعالى كلم بابا ويوم كذا هستناك تكون كلمتة
يروح مخترع لها بدل الحجة ميت الف حجة عشان ياجل الموضوعوالبنت مامنالة بقى عشان الولد غرضة شريف وعاوز يكلم بابا
لكن انا من هذا المزنق احب اقول لكل بنت وكل فيتاه
يا ماامنة للرجال يامامنة للمية فى الغربال
وطبعا هقول للبنات اللى اتخدعو فى الشباب وكانو فاكرين وموهومين ياعينى انهم بيدوبو فى دباديبهم
وفاكرين بقى ان الحياة كدة انتهت لما اكتشفو خداعهم

احب اقولهم
لا ياس مع الحياه ولا حياة لمن تنادى
وسمعنى احلى سلام ياسارق من عينى النوم انت حرامى........................
ويا مفرقين الشموووووووووووووع............ انا ما خدتش
رغى كتير ايه ده

الخميس، 16 أبريل 2009

هنو ابو الفصاد





فى البوست ده


انا بهنى صديقة عمرى وحبيبت قلبى


نور او حبيبة


صاحبة مدونة قصاقيص حبيبة


وبقولها عقبال ميت سنو احنا مع بعض يا حبيبة قلبى ونور عينى


ويارب منتفرقش عن بعض ابدا


والسنة الجاية نكون بنشتغل فى مكان واحد ونكون بنزل نفسنا تانى مع دكتور عادل او غيرة ونعمل الماجيستير


سوا


يارب مانتحرك من غير بعض ابدا يا حبيبتى


انشالله نتجوز احنا الاتنين راجل واحد بس مانسيبش بعض وخلاص

*****************************************************

تانى حاجة عاوزه اعملها فى البوست ده


هنفذ رغبة ابو العريف عشان ميزعلش واجاوب ع التاج


اسمك....؟

عبير

سنك...؟

ولية الاحراج ده بقى

انشاء الله هكمل 22سنة فى 24/6الجاى

مجال دراستك ؟

هندسة صناعية

اسم مدونتك ..؟

بين السماء والارض

الصوره الرمزيه لمدونتك بتعبر عن ايه ...؟

هى عبارة عن بنوتة سرحانة والحزن مالى عنيها

الصورة دى بتعبر عنى

هل فكرت في اغلاق المدونه ؟ والسبب ..؟

بصراحة فكرت مرة واحدة بس عشان كنت مشغولة اوى فى الدراسة

بس اقلعت عن الفكرة لان المدونة لسة جديدة

ايه رد فعلك لو حد قل ادبه عليك في تعليق ...؟

هههههههههههههه

السؤال ده مش هعرف ارد علية لان حصل قبل كدو وواحد قل ادبة على حبيبتى

ومسكتة انا ووحدة صحبتنا تالتة

خاليناه يحرم اصلا يدخل مدونات تانى ولا حتى يفتح ااكمبيوتر

اسوء مدونه...؟

لسة ماقابلتهاش

هيحصل ايه للايميل بتاعك لما تموت...؟

ههههههههههههههه

مش عارفة اصلى هكون مت

اديت الباسوورد بتاعك لحد ...؟

ايوة اديت الباسورد بتاعى لنور صحبتى وحبيبتى

السفر بالنسبالك ايه ...؟

حلم

المود بتاعك ؟

فى الغالب سرحانة وحزينة

بس بهرب من الحزن ده بالضحك

بتعمل ايه في وقت فراعك..؟

مش لما يبقى عندى وقت فراغ اصلا

الأكلة المفضله

مش عارفة

عادى

اصلى مش بحب الاكل

الصفات اللي ورثتها عن والدك.؟

العصبية والحنية

الصفات اللي ورثتها عن والدتك ..؟

الطموح وعزة النفس

اكتر ست حاجات بتكرهها...؟

الكدب

الخيانة

الكدب

الخيانة

الرجالة

الحب

اكتر ست حاجات بتحبها...؟

بابا

ماما

نور صحبتى

اختى واخويا

وانا

شخصيتك نوعها ايه....؟

شخصية رخمة ورزلة

معرفش طبعا احدد نوع شخصيتى

لماذا دخلت عالم التدوين ...؟

دخلت عالم التدوين عشان حسيت ان جوايا طاقة ولازم تطلع

ولاقيت ان المجال ده انسب مجال اطلع فية الطاقة اللى جوايا

اجمل كلمه اتقالت في وصف مدونتك.....؟

والله كل الكلمات الجميلة بتتقال من ناس فى منتهى الجمال

أهمية التعليق بالنسبه ليك ؟

التعليقات بالنسبالى هى ثمرة البوست المكتوب

احسن بوست كتبته ....؟

بوست يكفينى

وده اللينك

http://mougelbahr.blogspot.com/2009/02/blog-post_27.html

افضل بوست قرأته ...؟

مقدرش احدد

بس هم كتير اوى

تمرر التاج لمين...؟

والله مش عاوزة امررة لحد يكون مش فاضى

بس هوديه للبنت اختى لولو

صاحبة مدونة نظرة عين

السبت، 11 أبريل 2009

خيانة المشاعر


فى حد سمع قبل كدة عن نوع من انواع الخيانة اسمة خيانة المشاعر؟

انا بصراحة كنت عارفة ان فى انواع كتير من الخيانة
ومش المقصود بكلمة خيانة انها الخيانة الجنسية فقط

لالالالالا ابسولوتلى

الخيانة ليها معانى كتير وليها مفاهيم كتير

يعنى فى ست تقول على جوزها انة خانها لو عرفت بس انه كلم واحدة غيرها
رغم ان ده هبل يعنى
انا مش بحب التدقيق اوى كدة

لان بالشكل ده الراجل هيحرم يحكى للست حاجة من هذا القبيل لانها هتبدا تعتبرها خيانة وتبدا تتعامل معاه من منطلق انة خاين
وتطين عيشتة بقى وتضرب له بوزها شبرين ومتكلموش ولا تعملة اى شئ وده طبعا غلط
بس فى ستات بيعتبرو ان ده نوع من انواع الخيانة

وفى نوع تانى بيعتبر الخيانة انه مجرد التفكير بس

التفكير فى حد تانى

يعنى الرجل يفكر فى وحدة تانية غير مراتة
او الست تفكر فى واحد تانى غير جوزها
وده بقى ابشع انواع الخيانة وبيؤدى لخساير جامدة جدا

اولا مجرد ان الراجل يفكر فى وحدة غير مراتة معنى كدة ان الست مراتة مش مكفياة وفى نواقص فيها
وطبعا مفيش انسان كامل

المفروض الرجل التمام يتصرف ازاى لو ده حصل؟

لان طبعا موضوع المشاعر دى مش بايد اى حد فينا دى حاجة كدة بتاعت ربنا
لكن بيبقى فى حلول بديلة

يعنى لو فى وحدة جذبت انتباه الرجل لدرجة انه فكر فيها واخدت مساحة من عقلة للتفكير فيها باى شكل من الاشكال
المفروض ان الراجل يبدا يقارن بين الست دى والست اللى معاه
ويشوف النواقص دى موجودة فين بالضبط
ويبدا يخلى الست بتاعتة تاخد بالها من النواقص دى

وتحاول على اد ماتقدر تكملها عشان الراجل ميبصش برة
ومتاخدش الموضوع بحساسية وتقولة هو انا اعمل ايه ولا ايه
هيبقى انت والعيال وامك
يعنى انا هلاحق على ايه ولا ايه

لاء

الست الذكية اللى ترضى جوزها قبل اى حد تانى
لانها لو ارضت جوزها خلاص الدنيا كلها هتبقى سهل رضاها

لكن تعالو بقى للمشكلة الاكبر

لو الست هى اللى حست بخيانة المشاعر دى
يعنى الست حست ان جوزها منفضلها ومش بيديها حب ولا حنان

وفجأة واحد جذب انتباهها
تعمل ايه بقى الست دى

انا قلت فى البداية ان مسالة المشاعر دى بتاعت ربنا مش بايد حد فينا
عشان كدة مش عاوزة الاقى هجوم عليا من الرجالة
دى مشاعر والست ممكن برضو مشاعرها تتحول من ناحية زوجها

ساعتها الست دى تعمل ايه

انا من رايي انها تعمل زى الرجل وتحاول تحسسة هى نفسها تشوف ايه منة
ولو نفضلها زى العادة
يبقى تنفصل عنة
ده رايي
لانها مش هتقدر تعيش وهى جسديا مع واحد وعقلها ومشاعرها بتتدفق ناحية صورة واحد تانى

وبقول صورة واحد تانى

يعنى يمكن تكون مشاعرها دى متدفقة ناحية صورة مثالية فى خيالها
مش اكتر

يبقى تنفصل عنة لانها لو فضلت عايشة معاه هتفضل طول عمرها خاينة
ومش هتقدر تحافظ على بيتها مهما طالت مده جوازها

وطبعا النواع التالت من الخيانة وهو الخيانة الجنسية
وطبعا انا مش هتكلم فى النوع ده لانة اقبح واوحش صورة بيتحط فيها الشخص ادام نفسة وادام ربنا
ولازم فى كل الحالات نفكر فى ربنا قبل اى شئ
وفى النهاية ربنا يحفظنا يارب احنا وكل المسلمين
وتقبلو منى فائق الاحترام والتحية

الجمعة، 3 أبريل 2009

انا انثى.....فهل انت رجل؟؟؟؟



تريدها جميلة.....ذكية....رشيقة.....متدينة.....على خلق...من عائلة محترمة....بنت ناس طيبين....
ولكن لم ارى من قبل من يطلب الزوجة المثقفة

وعندما يقابل فتاه مثقفة يبهر بثقافتها ويعجب جدا بذكائها وينجذب الى قوة شخصيتها ويحب كثرة الحديث معها
ويلجألها فى بعض المشكلات التى تواجهه وياخذ برايها فى بعض المواقف والامور التى يتعرض لها

ولكن.........

اذا قابل الرجل امراه بهذه الصفات
يكتفى فقط بكونها صديقة او شخص يتباهى بمعرفته ولكن عندما يقترب الموضوع من الزواج

يفر الرجل من الزواج من المراه المثقفة

السؤال هو:
لماذا يخاف الرجل من الزواج من المراه المثقفة؟

الكلام ده اتقال فى موضوع حلقة من حلقات برنامج البيوت اسرار اللى بيتذاع على قناة الايه ار تى عين(ART) واحنا كنا من ضيوف هذا البرنامج وكنا بناقش هذة القضية

واثارنى الموضوع جدا وحبيت انى اعرضة على مدونتى عشان نتشارك سوا فى الراى
فى اكتر من نقطة بصراحة استفذتنى للمناقشة فى موضوع البرنامج وفى الكلام اللى اتقال

اولا
فى بداية الموضوع اتكلمو مع الضيوف الرجالة فى نقطة وهى ايه؟

هى انت تحب زوجتك تكون ايه
مثقفة ولا جميلة

وكانو بيخيرو الرجالة بين الامرين
بصراحة الموضوع ضايقنى من نقطتين

النقطة الاولى انهم اكتفو بسؤال الرجل انت عاوز زوجتك تكون ايه؟؟؟؟؟
ومهتموش ابدا الست عاوزة ايه

طبعا اغلب الردود كانت بتوحى الى ان تكون الزوجة
جميلة....من عيلة طيبة .....مؤدبة.....ومقربوش ابدا الى نقطة الثقافة
يعنى عاوزها انثى
انثى...........

اوك متفقين

انا انثى...

جميلة مؤدبة من عيلة كويسة متدينة اهتم بنفسى اعرف واجباتى
يعنى انا زى مانت عاوز

انا انثى

انت بقى......ايه؟
انت رجل؟؟؟؟؟؟؟؟؟

اذا كنت انا انثى وفيا كل الصفات اللى بتتمناها
انت ياللى انت عامال تتشرط وتتامر توصف فى شريكة احلامك
وتقول عاوز كذا ومش عاوز كذا

انت متاكد بقى ان انت هتنول اعجاب الزوجة اللى انت رسمتها دى
انت فيك الصفات اللى هى بتدور عليها هى كمان

من الاخر انت راااجل؟

زى مانت بتطلب انثى؟؟؟
من حقها تلاقى راجل

تانى نقطة وهى ان مش شرط ابدا الانثى تكون حاجة من الاتنين
ياما مثقفة يا ما جميلة

ممكن اوى الصفتين يجتمعو فى انثى واحدة
ممكن تكون مثقفة وفى نفس الوقت جميلة

ولكن

اذا كانت الزوجة مثقفة وتتعامل معاك من منطلق مستوى ثقافتها
انت هتعاملها ازاى
هتستقبل ارائها دى ازاى
هل هتحترم رايها
ولو رايها هو اللى صح يبقى رايها يمشى
ولا انت راجل وهى ست ولازم فى الاخر كلامك هو اللى يتنفذ؟؟؟؟

تانى حاجة فى موضوع البرنامج اتكلمو فيها وبصراحة ضايقتنى اوى

كانو عاملين مقارنة بين الرجل الشرقى والرجل الغربى

الرجل الغربى بيقول لزوجتة بحبك كل ساعة مرة او مرتين

اما الرجل الشرقى بيقولها بحبك مرتين اتنين طول عمرها
مرة قبل الجواز ومرة بعد الجواز ويقعد يذلها ويقولها افتكرى لما قلت لك بحبك يوم كذا كذا فى الشهر اللى فات

الرجل الغربى لما بيسوق العربية بيمشى بالراحة عشان ما يزعجكش زوجتة
اما الرجل الشرقى بيمشى بسرعة وبيبقى نفسة يلبس بالعربية فى سور عشان يخلص منها

الرجل الغربى لما بيزعل زوجتة بيروح يشتريلها ورد ويلاطفها ويداعبها

اما الرجل الشرقى يروح واخدها وش خشب ويقولها انتى ايه غاوية نكد وغاوية غم ايه العيشة اللى تقصف العمر دى

الرجل الغربى لما بيرجع يلاقى زوجتة بتنضف البيت ومخلصتش بيساعدها ويبوس راسها ويقولها تعبتى معانا النهاردة

الرجل الشرقى يرجع يلاقيها مخلصتش يروح يقولها اتنى لسة مخلصتيش لحد دلوقتى
انا نازل لحد ما تخلصى ايه الارف ده

يعنى كانت المذيعة بتحاول تعمل مقارنة بين الرجل الشرقى والرجل الغربى

بس انا بقى معترضة على حاجة

اى نعم اغلب الكلام الموجود ده بيحصل بس مش معنى كدة ان 100% من الرجالة الشرقيين كدة
مين رسم صورة الرجل الشرقى الوحشة دى
مين قال ان الرجالة الشرقيين كلهم كدة
وكلهم مش بيدو بس بياخدو

فى اى مكان فى الدنيا فى الكويس وفى الوحش
يعنى فى الغرب برضو فى الرجالة اللى مش بتعرف تتعامل مع زوجاتهم صح
واكبر دليل على كدة ان نسبة الطلاق فى الغرب تقريبا تصل الى50%
نسبة كبيرة جدا

انا مش بدافع عن الرجالة

لان برضو انا متغاظة منهم لكن الواحد يقول اللى لية واللى علية
عن نفسى انا شفت نماذج من الرجالة كتير اوى بتتعامل بمنتهى الرقة والحنان مع زوجاتهم حتى بعد ماكبرو فى السن

لكن لو بصينا للموضوع اصلا من زاوية تانية
نلاقى الموضوع كلة بيتلخص فى نقطتين اتنين

الراجل لو حط الحديث الشريف اللى قالة الرسول (ص) فى دماغة وهو بيختار زوجتة وشريكة حياتة
اكيد عمرة ما هيندم على اختيارة ابدا

قال الرسول (ص)
تنكح المرأة لاربع لمالها وجمالها وحسبها ودينها
فاظفر بذات الدين تربت يداك
صدق رسول الله

يعنى المفروض الرجل يختار زوجتة مش عشان هى مثقفة ولا جميلة ولا ولا
اهم ثقافة واهم حاجة هى الثقافة الدينية
لو وجدت النقطة دى عند المراه
اذا فيا حظ الرجل ده
امه دعيالة وهيعيش عيشة فل الفل

لكن خدها عشان هى جميلة ولا عشان عيلتها كويسة ولا عشان مالها فاعتقد ان كل ده زااااااااائل ولا يدوم الا الدين والاخلاق الحميدة
واذا اختارت المراة زوجها كما اشار النبى فى حديثة ايضا

اذا جاءكم من ترضون دينة وخلقة فزوجوة
صدق رسول الله

فدة اكيد هيكون سبب كبير من اسباب نجاح العلاقة بين الزوجين

لكن هتقعد تتامر وتتشرط على ايه
ما قبل ما تتشرط وتطلب شوف انت الاول فيك كل الصفات وكل الشروط اللى بتتمناها الانثى
يعنى من الاخر

بص لنفسك وبعدين ابقى اتكلم

اخر كلمة بقى لانى غلست وطولت اوى اوى
انا مش بهاجم الرجالة ولا بدافع عنهم
انا بس بقول كلمة حق من وجهة نظرى

وعلى فكرة مفيش حد غلط علطول ومفيش حد صح علطول

وتقبلو منى فائق تحياتى
وارجو ان اسمع مشاركتكو معايا فى الموضوع ده