الأحد، 16 مايو 2010

تصدق بمين


كلام مش عارفة ابدأه منين ولا اقول ايه
بس كل اللى نفسى اقوله انى اتخدعت للمرة المليون
وانى مبحرمش ابدا
اتخدعت زماااااااااااان فى اقرب الناس ليا
واتخدعت كمان فى اعز صحاب ليا
واتخدعت فى حب كنت بحبه
وعمر كنت هكمله
وبيت كنت بنيته وبعد كده هديته
اتخدعت فى صحاب تانيين ايام الكليه
واتخدعت فى امل جديد امنت بيه
وكنت فاكرة انى نجيت على ايديه
وبنيت بيت جميل تانى ورسمت فيه ضحكه جديدة وامل جديد
يمكن اعيش واحيا من جديد
لاقيت كل الكلام كلام والسلام
كدبه كدبها عليا
عشان يختبر ثقته فيا
مش زى ما قال
يختبر ثقتى انا فيه
اذا وصل لكلام معين كان عاوزنى اقوله بمعانيه
فانا كمان وصلت لاانى عمرى ما كنت هعيش فى امان وانا بين ايديه
لو كان لسه فى حد بيختبر حبيبه
فده لان عقله وقلبه ناقصين حب لحبيبه
مش قلة ثقه منه فيه
وفى النهايه
مصدووومة بجد ومش بنطق ولا عارفة ارد
مصدومة عشان شكلك فى عينى بقى مش ولابد

هناك 13 تعليقًا:

الشاعر الحزين يقول...

أووووووووووووووووووووووول تعليق


ايه بس الحلاوه دى

مبروك عليا طبعا

استنى جاى تانى

الشاعر الحزين يقول...

أنا جيت


أيوه جيت عندك مانع ؟؟؟


ايه يا موجه الكلام ده يخرب عقلك الموضوع أيوه صعب فى احساسه لكن مكتوب بأسلوب هايل هايل هايل فوق الوصف بجد والله جميل جدا جدا جدا الأسلوب والطريقه فى التعبير

مكنتش أعرف انك عندك كل الامكانيات دى بصراحه

لكن بالنسبه لمضمون الموضوع فده بقى مش هتكلم معاكى فيه دلوقتى

لأ يظهر كده أن أنتى محتاجه قرصه ودن وأنا اللى هقرصهالك بإذن الله

ياللا سلام بقى

ومره تانيه المضوع هايل بجد عجبنى أسلوبك قوى

داليـ ـ ـ ـ ـ ـ ــــا يقول...

موجتى

حساكى وواصلنى كلامك لان الوحده مننا مبتبقاش متوقعه ان حبيبها يختبرها
وفجأه تلاقيه فعلا كان معاها فى كلام مخصوص عشان يختبرها

شفتى حسن الظن بالغير بيعمل ايه

انتى عندك حسن ظن بيه

بس حاجه كويسه انه ينزل من نظرك هتقويكى عليه
وهتقدرى تبعدى عنه وتنسيه

لان الراجل من دول لو نزل من نظر حببته خلاص عمره مايقدر يسترد الشيئ ده تانى

تحيه ليكى

موجة يقول...

الشاعر الحزين
______________
مبروك عليك ياعلاء ايه
انك اول تعليق
ماشى ياعم
مبروووووك مع انك دايما ( بغشك طبعا)
الاول

موجة يقول...

الشاعر الحزين
______________
نورت يا علووووش
لاء معنديش مانع تيجى فى اى وقت
وبعدين ليه بس المجامله الجامدة دى
انا كده هتنفخ ع الفاضى
الاسلوب عادى جدا
بس عشان انت جميل بشوف كل حاجة جميله
وبعدين بلاش قرص تانى
انا اتقرصت بما فيه الكفايه
ورغم كده مبتعلمش
على راى انغام
وبعدين انا يهمنى رايك فى مضمون الموضوع
ياريت تتكلم فيه بقى
عشان عاوزة اعرف رايك

موجة يقول...

داليـــــــــا
________________
اسعدنى كلامك يا قمرى
وبجد قلتى اللى على لسانى
واصعب حب لما تلاقى ان انت بتفكرى ازاى تحبى حبيبك وتديله كل حاجة تفرحة وهو يفكرلك فى حاجة تغلطك ويفكر فى اختبار عشان يوقعك فى الغلط وتبقى حجة للبعد
بس اقولك
انا اللى برميه عمرى تانى ما ببص عليه حتى ولو روحى فيه
اشكرك يا قمر على استيعابك للموضوع
ومنورانى دايما

مهموهة أحمد يقول...

يا احلى موجة في احلى بحر في العالم

واحشااااااااااااااني موت و الله
و على فكرة زعلتيني اوي من الكلام
لاني مش عايزاكي تعيشي مجروحة
بس بردو فرحت لان شخص زي ده مش لازم تعيشي معاه و لا يستاهلك ابدا
و اذا انجرحتي دلوقتي اهون مية مرة من جرحك بعد ارتباطكم في بيت واحد

قولي الحمد لله و ارمي ورا ظهرك
اصل اللي مكتوبلك يبقى نصك التاني لسة ما جاش و ساعة ما ييجي صدقيني هتلاقي الدنيا كلها بتضحك لك و هتعرفي الفرق بينه و بين اي حد تاني

ربنا يهنيكي و تعيشي سعيدة طول العمر يا رب

حبيبة قلبي واحشاني اوي اوي اوي و بجد بفرح اوي بيكي
و على فكرة انا اسمي مهموهــة بالهاء
دلع مها
مش مهمومة من الهم ربنا ما يكتب الهم على عباده يا رب

حبيبة قلبي نفسي نتعرف
و ليا الشرف و الله

انا عندي اشراف على التعليقات لو تحبي تكتبيلي ايميلك علشان نتكلم ده يبقى شرف ليا و هبقى احذف التعليق

ربنا ما يحرمنيش من ضحكتك الحلوة

خالص حبي و تقديري

باحث عن حب يقول...

لو كان لسه فى حد بيختبر حبيبه
فده لان عقله وقلبه ناقصين حب لحبيبه
مش قلة ثقه منه فيه

مفيش حاجه
فى الحب
اسمه
اختبار
ده
اسمه
عبط

وبعدين\حياتنا
كلها
كده
وقوع
ووقوف
وابتسامه
وفكره
وحزن
ذكريات
ذكريات

كله
على بعض

بيعمل
محل

كشرى
اللى
اسمه
حياتنا

تحياتى

موجة يقول...

مهمومه
__________
روح قلبى انا
اشكرك بجد على كلامك الجميل ده
واشكرك اكتر على اهتمامك بحالتى وتقديم النصيحة ليا
وكمان انتى واحشانى اكتر
وانا ليا الشرف بجد انى اتعرف عليكى ميل وتليفون وفيس تو فيس كمان
وفى مشروع كده عاوزه ابقى اقولك عليه انا وانتى وداليا وساسو
ونلاقى كمان مشتركين تانيين
بس استنى اما ادورها فى دماغى
منورانى دايما

موجة يقول...

باحث عن حب
_______________
قولى الاول انت لاقيت الحب ولا لاء
اعتقد لو لاقيته يبقى انت غلطان ولو ملقتوش يبقى ابشرك انك عمرك ما هتلاقيه
وثانيا اشكرك على التعليق وعلى تعيبقك على البوست بكلمات توضح معناه
الا وهى ( عبط )و ( محل الكشرى )
عجبنى لوصف اووووى
منورنى دايما
وتحياتى ليك

Tarkieb يقول...

ولا يهمك مش حتكوني لا اول ولا اخر المخدوعات..بس احمدي ربك كان زمان الناس تروح تشرب لها كاس عشان تنسى.وبعدها بتعمل حادثة بالعربية يفقدوا فيها الذاكرة ويحبو تاني ولاد الاية من جديد ...دلوقتي كله بقى بيفتح بلوج وينكد علينا ويخشو الاول يفضل يقولو انا بحب يا جدعان ومعاك ياروح القلب وحتى اخر العمر وبعدها يكتب انه اتخدع زيك كدة..وطبعا بنخش نطبطب وندادي وبعدها يحبو تاني وهكذا...اللي ما بيقتل بيقوي ياباش مهسهسة..انا جيت اهو زي ما قلتي بس حظي المنيل لونك حزايني المرة دي ..ابقى قولي لما تنسي عشان اجي

موجة يقول...

Tarkieb
_________
تصدق والله عندك حق
بس احلى حاجة قلتها ونفسى اعملها او نفسى تحصلى
نفسى افقد الذاكرة
واعيش بدماغ جديدة ونضيفة ما فيهاش اى حاجة
ع الفطرة
اشكرك على تعليقك ونورتنى وابقى تعالى علطوول

التميز المثالي للخدمات المنزلية يقول...


شركة تاج للتنظيف بالدمام 0551844053


شركة مكافحة حشرات بالدمام

شركة رش مبيدات بالدمام

شركة تنظيف بالدمام


شركة تنظيف شقق بالدمام


شركة تنظيف فلل بالدمام


شركة رش مبيدات بالخبر


شركة مكافحة حشرات بالخبر



شركة تنظيف شقق بالخبر


شركة تنظيف سجاد بالدمام


شركة مكافحة حشرات بالاحساء

شركة مكافحة النمل الابيض بالاحساء


شركة مكافحة حشرات بالجبيل

شركة مكافحة النمل الابيض بالجبيل


شركة تنظيف منازل بالجبيل

شركة رش دفان بالدمام

شركة مكافحة النمل الابيض بالدمام