الأحد، 8 مارس 2009

وصية الريس!!!




التفت الأسرة حول فراش الزعيم وهو يلفظ أنفاسه الأخيرة...


قال الزعيم بصوت ضعيف ولكنه حازم في نفس الوقت

حسنى: كلكم موجودين

سوزان: أيوه يا حسنى... أنا جنبك أهه... وأدى جمال وعلاء... قمرين دول ولا عينين

حسنى: طب اسمعوا اللي حقوله كويس

جمال: سامعينك يا بابا... اتكلم

حسنى: مصر دى كنز يا ولاد... امسكوا فيها بايديكم وسنانكم... بنسرق فيها بقالنا سنين وسنين ولسه بتدينا

علاء: هي دي البركة اللي بيقولوا عليها يا بابا

حسنى: أيوه يا بنى... ربنا يبارك لكم ولعيالكم فيها... ودلوقتى اسمعونى

علاء: انته علي الهوى يا بابا... اتكلم

حسنى: أنا مش مديون لحد يا ولاد... يعنى أي واحد يصيع عليكم ويقول لكم أبوكم كان مستلف منى فلوس تفوا في وشه علي طول

علاء: اطمن يا بابا... حرامى علي حرامى ما يلعبش

حسنى: أنا سيبت لكم يا ولاد اللي يكفيكم انتوا وعيالكم وعيال عيالكم ويفيض... فلوس متلتلة متتعدش... مش حقول لكم حافظوا عليها وبس... لالالالالا زودوها كمان وكمان لجل ما روحي ترتاح وأنا في تربتى

جمال: هيا الفلوس اللي انته عملتها يا بابا دي بتسميها فلوس... شفنى أنا وعلاء هنعمل ايه... ولا صحيح حتشوفنا إزاي... عموما ما تقلقش

حسنى: ودلوقتى اسمعوا وصيتى... الحكم لأولاد مبارك..... لزم أول ما جمال يحلف اليمين تغيروا اسم مصر وترجعوه زي ما كان زمان أيام الملك فاروق والملكة نازلي (المملكة المصرية)

جمال: مفهوم يا بابا... خش في اللي بعده حسنى: الجيش والشرطة والأزهر... اوعوا واحد من التلاته دول يخرج عن طوعكم أبدا

علاء: مفهوم برده... اللي بعده... يا ساتر ده انته ملل

سوزان: عيب يا علاء لما تكلم أبوك كده

علاء: بهزر يا ماما

حسنى: الهرم لأم العيال... ليكى يا سوزان بعد ما خدمتينى بتفانى وإخلاص طول السنين دى

سوزان: هرم... هيا دى آخرة صبرى!... وده يسوى كام ده

علاء وهو يمسك بالآلة الحاسبة: يسوى كتير يا ماما ... لو تحبى اتصرف لك فيه ممكن يعمل معاكي مبلغ كويس

سوزان: مش حرضى بأقل من التلات أهرامات وأبو الهول

حسنى: مش خسارة فيكى يا غالية... أثار النوبة لعلاء... والأقصر لجمال... ودلوقتى نيجى للميه... الساحل الشمالي لعلاء والبحر الأحمر لجمال وقناة السويس تخصصوا دخلها صدقة جارية علي روحى

سوزان: أنته أكيد مخبول... مليار ونص دولار صدقة جارية علي روحك

جمال: ما تاخديش علي كلامه يا ماما... ده يبقي كتير لو طلعنا 100 ولا 200 جنيه علي روحه للفقرا

علاء وهو يمسك بالألة الحاسبة: ممكن نطلع لحد ألف جنيه يا جمال... السيولة تسمح

حسنى: أوعوا تفرطوا في حبيب العادلي من بعدى يا ولاد... حبيب قلبه ميت وأيده طرشه... وهوه ده اللي ينفع مع الغجر اللى هنا!!

جمال: بس ما بيعجبنيش شنبه يا بابا

حسنى: أنته مالك ومال أم شنبه... احنا بنشترى مجرم

جمال: أعاهدك يا بابا أني هخليه معايا ومش حفرط فيه أبدا

حسنى: الشيخ طنطاوى يا ولاد راجل بركة... يمين يمين شمال شمال... أوعوا تفرطوا فيه... بس ما تخلوهوش يصلي عليا لأني بصراحة مش متأكد إن كان ربنا حيقبل منه ولا لأ!!

علاء: ولا يهمك يا بابا... حخلى أنكل كمال الشاذلي يصلي عليك

حسنى: والله لوعملتها يا علاء لكون متبرى منك إلي يوم الدين

علاء: بهزر معاك يا بابا... أنكل كمال مش حافظ الفاتحة

حسنى: المشير طنطاوي يا ولاد... مش حوصيكم عليه... الراجل ده عامل زى الست المستحية... حاطط وشه في الأرض علي طول وعمره ما استجرى يرفع عينه فيا... وفي نفس الوقت ماسك الجيش بإيد من حديد

سوزان: هوه فعلا خجول وكل ما يشوفنى ما يقوليش غير يا ست هانم... إبقي خليه معاك يا جمال

جمال: حاضر يا ماما

حسنى: عايز جنازتى يا ولاد الناس تحكى وتتحاكى عنها... هاتوا المخرج الإيطالي ده اللي إسمه مكافيللي يصورها

علاء وهو يمسك بالألة الحاسبة: هوه حيكلفنا كتير... لكن ممكن في الأخر نلم مبلغ معقول لو خلينا شركة أجنبية تحتكر حق توزيع الفيديو في أوروبا وأمريكا

حسنى: عايز أحلي مدفع يشيل النعش يا ولاد

جمال: مدفع رشاش

سوزان: الهزار مش في الحاجات دى يا جمال

جمال: آسف يا ماما

حسنى: عايز أدفن في شرم الشيخ يا ولاد جنب أولمرت وشارون

علاء: يعنى بلاش كفر مصيلحة

حسنى: لأ كلها براغيت يا علاء... وإسم شرم الشيخ كمان أشيك بكتير

الكلام ده طبعا مش كلامى ولا تأليفى

وانا مش بقول كدة خوف

لالالاء...ابسولولتلى

بس دى الحقيقة

انا لاقيت اختى بتقولى تعالى شوفى وصية الريس

قلت لها يابت هو مات؟؟؟؟

قالت تعالى بس

بصيت كدة لاقيت ملف وورد

قلت لها عادى ده ملف وورد ممكن يكون اى حد مألفها

بحسبها وصية بقى بجد

قالت لى لاء

مش عارفة مين كدة بعتهالها من ع النت

لما قريت

ممممممممش عارفة اقولكو ايه

انا ضحكت طبعا ع الحوار

بس بصراحة

................

مش هقولكو ع الاحساس اللى حسيته

هشوف كل حد هيقرا الكلام هيحس بايه؟؟؟؟؟

وبمنتهى الصدق تقولووووووووو

وانا هقولكو طبعا.....




هناك 14 تعليقًا:

أبو العريف يقول...

يخرب بيت عقلك
الوصيه تجنن
بس لازم انت كمان تكتبي وصيتك
عشان اللي هيحصلك
بس ولا يهمك
كلنا معاكي
انا عموما هجهز العيش والحلاوه من دلوقت
بس خلي بالك
حبيب ايده طرشه
ياله
ربنا يرجعك لينا بالسلامه

موجة يقول...

السلام عليكووووووووووو
موووووووووووجه
بجد موضوع رائع ومسلى ومضحك وبيطلع ف النهايه بفكره حلوه تبين مدى الظلم اللى احنا فيه
تحياتى ليكى
لولو

فشكووول يقول...

تصدقى انت فعلا موجه
ازيك الاول

انا مش حاقول ولا كلمه .. هو انا ناقص .. انت يا موجه جريئه قوى .. والله ما حد يقدر يقول الكلام ده
... بس انت عشره على عشره
انت كده

الله يخرب بيوتهم والبيوت اللى جنب بيوتهم
انا حاطلع جرى من المدونه دى قبل ما حد ياخد باله منى
سلام

نـــــور يقول...

انا برضو قلت انتى مش توصلى للدرجادى
اصل الكلام ده يودى فى حبيب قصدى فى داهيه

انا عارفه ان انا وانتى عايزين مصيبه تشيلنا ومش بيهمنا بس برضو انتى ماتطلعيش الكلام ده
بس سيبك انتى هزار علاء عسل
هو ابوه حسحس مش كتبنى ليه فى الميراث هو كمان ؟؟؟

اه على فكره انتى كمان مش هنبفى ندفنك فى كفر بحلق اللى انتى عايشه فيه انا ياحبيبتى بس انتى اعمليها وغورى وانا اعملك اشيك مدفن فى الغردقه :))

اومااااااال هو انا عندى كان مووووجه ؟؟؟؟!!!

الشاعر الحزين يقول...

أول زياره ليا فى مدونتك الجميله جدا
وأنا بجد محظوظ ان أول زياره تكون لموضوع جميل قوى بالشكل ده
لكن هقولك على احساسى بجد
أنا ضحكت قوى
لكن فى نفس الوقت حزنت قوى قوى قوى
على الوضع الى احنا فيه
وتقبلى مرورى وتحياتى لكى

ســـهــــر يقول...

وكمان بيتقسموا
ههههههههههههههههههه
لكل ظالم يوم قدام رب العباد
بوست لذيذ يا بنوتى
تحيـــــــــــاتى

موجة يقول...

طبعا انا بشكركو كلكو على التعليقات وهقولكو دلوقتى احساسى لما قريت الكلام ده انا كمان
اه اشمعنى انا بقى
انا بصراحة ضحكت
لكن فى نفس الوقت
اتضايقت
من حاجتين
اول حاجة ان ممكن يكون حقيقى المضمون صحيح
تانى حاجة ان فى حد ممكن مايكونش عندة اى انتماء للبلد ويقول كلام زى ده على الريس
طبعا انا عندى مثل بقولة دايما
انا واخويا على ابن عمى وانا وابن عمى ع الغريب
ميصحش ابدا نشمت اى حد خارجى فينا
ولا نضحك اى حد علينا بالشكل ده
لان ممكن اوى ناس فى دول تانية تكون بتشوف الكلام ده
ويضحكو علينا
طب وليه؟؟؟؟؟؟؟؟؟
عيييييييب اوى كدة
ومتشكرة على العيش والحلاوة اللى انتو هتجيبوهالى فى المعتقل انشاء الله
لانى مطمنة اوى وحاسة انى هشرفة قريب
ابقو افتكرونى ياجدعان لما اروح فى دهية

فشكووول يقول...

موجه العزيزه ..
تحياتى
اشكرك على الزياره
نورتينى وشرفتينى وارجوا ان تدوم الزيارات
وكل سنه وانت طيبه

حبيبة الروح يقول...

انا مالي يختي وانا مالي
ولا اعرفك يا اسمك ايه انتي
بت فين الحب المستحيل
هتتعضي انا عايزة بقيت القصه مش تهرجي
بجد انا عايزة اعرف اخيرها
علي فكرة انا كمان شايفه انه عيب الكلام ده يتقال لان الناس بتضحك علينا مش احنا الي بنضحك

momken يقول...

ازيك يا موجه

البوست هايل
وسيناريو جميل جداً ماشاء الله
ودمك شرابات


كمان النصيح روعه

تسلم ايدك

تحياتى

غير معرف يقول...

هلا بيبى
اكيد عرفتينى
والله اجمل ما فى المدونة الوصية
جميلةوظريفة
وانا بتمنالك كل النجاح و التوفيق
وقبل مانسى
خلى بالك من ابو ايد طرشة
اكيد عرفتية
اصل كدة ممكن اجهزلك العيش والحلاوة
مع تمنياتى لك
بالنجاح الدائم
المصرى المهاجر

جريدة الريماس للأخبار الحصرية يقول...


شركة عزل خزانات شمال الرياض
شركة عزل خزانات شرق الرياض
شركة عزل خزانات جنوب الرياض
شركة عزل خزانات غرب الرياض
شركة عزل اسطح بالرياض
شركة عزل اسطح شمال الرياض
شركة عزل اسطح شرق الرياض
شركة عزل اسطح غرب الرياض
شركة عزل اسطح جنوب الرياض
شركة تنظيف كنب بالرياض

جريدة الريماس للأخبار الحصرية يقول...

شركة تنظيف منازل شمال الرياض
شركة تنظيف منازل شرق الرياض
شركة تنظيف منازل غرب الرياض
شركة تنظيف منازل جنوب الرياض
شركة عزل خزانات بالرياض

التميز المثالي للخدمات المنزلية يقول...


شركة تاج للتنظيف بالدمام 0551844053


شركة مكافحة حشرات بالدمام

شركة رش مبيدات بالدمام

شركة تنظيف بالدمام


شركة تنظيف شقق بالدمام


شركة تنظيف فلل بالدمام


شركة رش مبيدات بالخبر


شركة مكافحة حشرات بالخبر



شركة تنظيف شقق بالخبر


شركة تنظيف سجاد بالدمام


شركة مكافحة حشرات بالاحساء

شركة مكافحة النمل الابيض بالاحساء


شركة مكافحة حشرات بالجبيل

شركة مكافحة النمل الابيض بالجبيل


شركة تنظيف منازل بالجبيل

شركة رش دفان بالدمام

شركة مكافحة النمل الابيض بالدمام