السبت، 8 يناير، 2011

اكيد مش ده الحل


يوم 3/1/2011
الاتنين اللى فات
واليوم اللى بعده

القاهرة ولعت

حد سمع حاجة
ما اعتقدش

انا بقى سمعت وشوفت كمان
مش معنى انى غضبان اتصرف بهمجية
ومش معنى ان ليا حق اضيعه باديا وبالعصبية
مش بالهتاف هيرجع حقى اللى انهدر
ولا بالزعيق هقدر اسيطر على كل اللى اتظلم

اكيد مش ده الحل

مش بالمظاهرات اللى عطلت مصالح الناس يوميها
ومش بالاعتداء على ناس مالهمش ذنب غير انهم كانو فى الشارع ده فى الوقت ده
ذنبه ايه واحد مروح من شغله تتهجمو عليه فى عربيته وتكسرو زجاج سيارته وتضربوه
عملكو ايه
يكونش هو اللى ولع فى الكنيسة فى اسكندرية

ذنبه ايه اب رايح يجيب بنته من الكليه يلاقى بنته بتعيط له فى التليفون وتقوله انا خايفة يابابا
ده مولعين فى كل حته هنا وبيتهجمو ع الناس

ذنبها ايه الست الحامل راجعة من شغلها عاوزة توصل بيتها بدرى تلاقى طريقها مقفول ومافيش مواصلات ع الطريق لان البهوات قافلينه ومولعين فيه

ذنبها ايه وهى حامل تمشى سبعة كيلو على رجليها
مافيش حتى موتسيكل ولا بسكلته توصلها
وتوصل لبيتها الساعة 11 بالليل

حرام ده ولا حلال

اقولكو
حلال
عارفين ليه

لاننا شعب همجى صوته عالى وبس
مابيعرفش غير يتكلم ويهلل لكن يعمل حاجة لاء

عارفين

احنا اللى بيحصلنا ده شويه علينا لاننا شعب اتسم بالتخلف
ماهو اللى يولع فى عربيات ناس ويكسرها ويقفل طريق عمومى يومين ورا بعض ومايبصش ان فى الشارع ناس مالهمش ذنب
اللى يعمل كده يبقى متخلف

ياترى بعد ما اتظاهرتو
وهتفتو

وولعتو فى الدائرى ومدينة نصر وصلاح سالم
ياترى بعد كل ده

جبتو الجانى عرفتو مين حرق الكنيسة رجعتو الكنيسة اللى اتحرقت
حكمة اتقالتى زمان

الصوت العالى من ضعف الموقف
وماتجيش تقولى

الحق صوته عالى
دى كناية عن قوة الحق يعنى اطلب حقك

مش تقفل الدائرى وتوولع فيه
بس فى النهاية
يبقى انت اكيد المصرى

هناك 23 تعليقًا:

Ramy يقول...

لسه بأكتب

بوست عن ده على فكره

و كُنت كتبت بوست قبل اللى انتِ معلقه عليه عندى عن كدة برضه

موجة يقول...

الله ينور عليك ياعم رامى
عاوزة اشوف رايك فى البوست بتاعك بقى مستنية اهو

Ms Venus يقول...

جايز اللى بتقوليه ده حصل مع انى بشك فى ده


وغلط انه يحصل ده لو فعلا حقيقى

لكـــــن



قبل ما نتكلم ونكتب ياريت نستنى كده دقيقة واحدة ونفكر ونحس بغيرنا


الناس دى شافت اهاليها واولادها متقطعيين اشلاء والدم نهر فى الارض


علشان نقدر نفكر صح

لازم نحس بغيرنا هو حاسس بايه

موجة يقول...

Ms Venus
__________
الاول انا باكد لك انه فعلا حصل
ثانيا
الناس اللى اتقطعت وشافت اهلها ماتت دوول اغلبيتهم فى اسكندرية فرد الفعل فى القاهرة المفروض يكون اقل حدة عن كده
ثالثا
ذبهم ايه ناس مالهمش ذنب
مش هم السبب اصلا
بل بالعكس ممكن يكونو مستاءين زيهم واكتر
بس بجد
دى همجيه
اشكرك لابداء رايك

Ms Venus يقول...

فى شىء مهم جدا ولازم الناس تعرفها


اتقال ان المظاهرات الغاضبة كسرت الكاتدرائية


طيب سؤال بالمنطق كده

هل المسيحين الغاضبين هيكسروا كنيستهم ؟


بالطبع لا


فى ناس مخربة دخلت بين المظاهرات وهى اللى عملت كل ده

واكيد هى اللى عملت اللى انتى ذكرتيه يا موجه


الناس خرجت مسيرة سلمية تقول حرام وكفاية


ولو كان حصل تخريب

ثقة انهم عناصر مخربة اندست بينهم

Ramy يقول...

احب اوضح حاجة
بس

انا مع الغضب و الحُزن اللى حصل

لأن الموضوع صعب

بس منغير تكسير و منغير تخويف الناس اللى ملهاش ذنب

بس يا موجه عارفه هقولك حاجة غالباً بيكون فى مُحرض للناس اللى اساسا بتكون مشحونة

و فوق دة كُله احنا كشعب عموماً قليل ما تلاقى فيه حد مش همجى عموماً

يا بشمهندزة

و على فكرة اللى عمل كدة و قطع الطُرق ووووو

مفرقش بين مُسلم و مسيحى

علشان يبينوا ان الدنيا خربانه

على فكره برضه انا فاهمك جداً

و فاهم فينوس جداً

sony2000 يقول...

فعلا وهو دا اللي حصل
مااتعلمناش ثقافه اذاي نطالب وناخد حقنا صح
ودي اخرتها

سندباد يقول...

لسه بدري علينا في حاجات كتير اوي
احنا لسه في كي جي 1 اخلاق وتحضر ووعي وفهم
وبغض النظر عن المناقشة اللي حصلت بينك وبين فينوس دلوقتي
كلنا غلطانين وكلنا مش فاهمين
وكلنا مش عايزين نعرف مين عدونا
وللاسف ولي الامر عاجبه اللي بيحصل وقاعد يضحك علينا بقاله 30 سنة
ولكي الله يامصر

Ms Venus يقول...

محدش بيوافق على الخراب

ومحدش يوافق على الدم


ومش معنى كلامى ابدا انى اقول لا لازم نخرب ونكسر

لكن انا متاكدة ان اللى عمل كده ناس موجهه للتخريب وبس


وزى ما قال سندباد

اللى سبب كل ده قاعد بيتفرج ومش هامه الناس

لكن بردو هرجع واقول الغضب والاحساس بالقهر والظلم قاسى اوى اوى اوى

mrmr يقول...

اكيد مش ده فعلا الحل
لكن ياريت تحسى باحساس الغير والتمسى العذر
والنهب والخراب اللى حصل دى ناس مندسه فى الوسط بتخرب
ومن حق اى شخص يغضب لكن لا يخطى
حسب تعليم الكتاب
اغضبوا ولا تخطئوا

الشاعر الفنان أحمد فتحى فؤاد يقول...

الحل أبدا مش فى التكسير و الهدم

و لا فى القتل و الدم

اللى كسر و هدم مش إخواننا المسيحين

اللى عمل كده أكيد دخلاء عايزين يولعوها

يمكن التظاهر السلمى كان تعبير عن الحزن .. لكن تخريب و تكسير لا و ألف لا

مش أبدا صديقى و أخويا المسيحى اللى ممكن يكسر عربيتى او يقلع شجرتى علشان حاجه هو يعرف و انا اعرف إنى ماليش يد فيها

على التعميم طبعا

بلدنا مصرنا حبيبتنا مش ممكن حد يقدر يهزها و يفرقنا أبدا
تحياتى

همسات وبحــ الحياه ــر يقول...

انا جاية اسلم عليكى
وعارفه انى مقصره معاكى كتييير بس هانت اهو كلها ايام
دعواااااتك ياقمرى

موجة يقول...

ms venus
______________
انا معاكى
ورايك منطقى جدا
بس ليه ندى فرصة للمخربين يندسو وسط الغضب
ليه ندى فرصة للارهاب يزيد باشكال مختلفة
ماهو التكسير وقت الغضب برضو شكل من اشكال الارهاب
اقولك حاجة
انا كان نفسى اطلع فى مظاهرة مع الاخوان المسيحيين والمسلمين
مظاهرة صامتة

لكن اما عرفت اللى حصل
قلت
نوووو كومنت
احنا كده بنزود مش بنهدى
وربنا يهون على كل اللى اصابتهم الفاجعة ونحن معهم لانهم لنا اخوان

موجة يقول...

RAMY
_____
مش عارفة اقولكو ايه ياجماعة
كلامكو كويس وانا معاه
وانت يارامى بتتكلم بعين العقل
بس يارب اصحاب العقول تميز وتقدر تفرق بين المخرب والغضبان
انت عارف ان العاطل بيكون فى الباطل
ربنا المنتقم

موجة يقول...

SONY2000
_________
اخرتها الخراب
لانها خربانة اصلا
عاملة ايه ياقمر فى الزحمة دى

موجة يقول...

سندباد

--------
ضحكت عليه نفسه
حسبى الله
ربنا هيحاسب كل مسئول
بس تعرف ياسندباد
انا كنت مستاءة كده لما قريت اننا لسة فى سنة اولى اخلاق
ازاى واحنا المفروض نبقى الدولة رقم واحد فى الاخلاق
لاننا المفروض بنقتدى باخلاق سيدنا رسول الله محمد صلى الله عليه وسلم
بالنسبة للمسلمين
والسيد المسيح عليه السلام
بالنسبة لاخوانا المسيحيين

اززااااى نبقى اخر حاجة فى كل حاجة

اخلاق وتحضر وفهم
لنا الله
احسنت التعليق

موجة يقول...

MS VENUS
____________
فهماكى يا جميل
ومفيش اختلاف فى اراءنا
بس كل منا ليه طريقة تعبير
ربنا يصبرنا جميعا كما قلت
وبحييكى مرة كمان على اهتمامك بابداء رايك

موجة يقول...

MRMR
______
صدقينى يامرمر
بجد انا حاسة بالناس اللى شافت الواقعة واللى سمعت بيها واللى لمسوها فى حد من صحابهم واقرايبهم
اذا كنا احنا بنحس باخوانا فى فلسطين
مش هنحس ببعضنا يامصريين
وبرضو بلتمس العذر
لكن خايفة
كنت خايفة اووووى من موجه الخراب اللى هتتعمل تحت اسم الغضب وتندس اذرع ارهاب اخرى وسطهم
اعذرينى فى تعبيرى
اكيد الفاظى خانتنى

قلبى معاكى ومعاكو كلكو والله

موجة يقول...

الشاعر الفنان أحمد فتحى فؤاد
____________________________
طبعا لا والف لا
والحمد لله على الوحده الوطنية التسامح الدينى اللى موجود فى قلب كل مصرى
والا كانت ولعت بجد
كانو ممكن يضربو مسجد بعدها بكم يوم
عشان يولعوها ويقولو المسيحيين ضربو المسلمين انتقاما لهم
وكانت تبقى مجزرة
الحمد لله
اللى حصل عكس كل اللى هم خططو ليه

الحمد لله

موجة يقول...

همسات وبحــ الحياه ــر
_________________________
ربنا معاكى يابنوته يارب ويوفقك
ماتشيليش هم ابدا
ربنا هيوفقك

هبة فاروق يقول...

دى اول زيارة وسعيدة انى اتعرفت على مدونتك الجميلة
وموضوعك فى الصميم
الله يهدى الحال ويهدى الامور

موجة يقول...

هبه فاروق

-------------
نورتى المدونه المتواضعة ونورتينى ياهبه
ويارب مايكونش اول زيارة واخر زيارة

mahmoud elsayed يقول...


شركة تاج للتنظيف بالدمام 0551844053


شركة مكافحة حشرات بالدمام

شركة رش مبيدات بالدمام

شركة تنظيف بالدمام


شركة تنظيف شقق بالدمام


شركة تنظيف فلل بالدمام


شركة رش مبيدات بالخبر


شركة مكافحة حشرات بالخبر



شركة تنظيف شقق بالخبر


شركة تنظيف سجاد بالدمام


شركة مكافحة حشرات بالاحساء

شركة مكافحة النمل الابيض بالاحساء


شركة مكافحة حشرات بالجبيل

شركة مكافحة النمل الابيض بالجبيل


شركة تنظيف منازل بالجبيل

شركة رش دفان بالدمام

شركة مكافحة النمل الابيض بالدمام