الجمعة، 6 أغسطس 2010

احنا فى نعمة




بعد تحيه الاسلام السلام عليكم ورحمة الله وبركاتة

نحمد الله حمدا كثيرا ونشكره على نعمة الاسلام

فالحمد لله الذى جعلنا مسلمين والحمد لله الذى كتب لنا ان نكون من امة سيدنا محمد صلى الله عليه وسلم

خير امه لخير نبى صلوات ربى وسلامه عليه
فاما موضوعى اليوم فعن الدين الاسلامى والمسيحى
منذ يومين تقريبا حكمت عليا ظروف شغلى بان اجلس مع احد المسيحيات وتحدثت معها فى امور كثيرة وتطرقنا فى الحديث الى الدين المسيحى والدين الاسلامى
وبعض الامور كيف تحكم عليها من وجهة نظر الدين المسيحى
واتضح لى الاتى :
طبعا دى مش اول مرة اعرف حد مسيحى او اتكلم معاه
لكن البنت دى اثارت فيا الفضول لان اعرف اكثر عن الدين المسيحى ورايت فى كل من عرفت من المسيحيين بان فيهم صفات مشتركة
كم اتمنى ان تكون هذه الصفات هى صفات البشرية والاولى بهذه الصفات هم المسلمين
امة محمد صلى الله عليه وسلم خير الخلق سيد الاخلاق والقيم الحميده
وجدت فيهم طبع الهدووووووء الحاد ولا يتكلمو الا اذا طلب منهم الكلام وجميعا متمسكين بتعاليم دينهم ومن علم منهم شيئا ينفذه
رايت فيهم حبهم للنبى عيسى والذى يسمونه يسوووع
كل ما نتحدث عن اى امر تقول لى
علمنا يسوع كذا وكذا
فين ده فينا؟
فين حبنا لسيدنا محمد صلى الله عليه وسلم ؟
فين تنفيذنا لتعاليم الرسول وتعاليم الاسلام
عندهم عادى البنت تمشى بشعرها وعادى تلبس نص كم او كده
بس مشفتش فيهم حد بيتجمل بادوات التجميل والمكيااااج اغلبهم على طبيعتهم
لكن عندنا مسلمااااات بالاسم بيلبسو اللى ربنا حرمة"كاسيات عاريات"
وبيحطو فى خلقهم مساحيق انشالله تتحول لمساحيق كاويه تولع فى وشهم
وعند المسيحيين الصلاه مش فرض عليهم بس الصلاه عندهم للتقرب من الله
وبالرغم من كده بيصارعو للتقرب من الله بالطريقة اللى اتولدو لاقو اهاليهم بيعلموهالهم
واحنا ربنا فارض علينا 5 فروض بناخد اجرهم خمسين
وتلاقينا مهملين فى اداء الصلاه
عندهم التسامح ده شئ اساسى
ملاقيتش قبل كده واحده مسيحيه بتشتم صحبتها ولا بتضربها ولا بتعلى صوتها ولا بتقل ادبها
لكن تلاقى اغلب البنات الشلاء مسلمات وتلاقى الالفاظ البذيئة والصوت العالى وقلة القيمة فى بنات الايام دى
يا سبحان الله
بس فى حاجة غريبة كمان لفتت نظرى فى النقاش اللى دار بينى وبينها
سالتها عن الايات التى نزلت تبشر عيسى بن مريم عليه السلام بنزول النبى الامى احمد صلى الله عليه وسلم
لاقيتها بتقول ان مفيش حاجة عندهم فى الانجيل بتدل على البشرى دى
وطبعا عرفت منها انهم بيعتبرو عيسى ابن الله
وفى طائفة تعتبر ان عيسى هو الله
وفى طائفة غير موجوده حاليا وهى تعتبر ان عيسى نبى وان الله واحد
اشهد ان لا اله الا الله وان محمد رسول الله
فسالت نفسى سؤال
هى الناس اللى اتولدت لاقيت اهلها مسيحيين وطبعا الانجيل اللى بيقروه المحرف ما فيهوش حاجة تدل على بشرى النبى الامى
طب الناس دى موصلهاش الدين الحق
لان البيئة اللى عاشو فيها كلها كده
طب هيتحاسبو ازاى بس
الناس دى محدش عرفهم ان دين الاسلام هو الدين الحق
محدش عرفهم ان اخر امة هى امة النبى الامى صلى الله عليه وسلم
اتحيرت جامد
وقعدت ليله كاملة احاول ادور على اى حاجة عن الدين المسيحى ع النت ولاقيت حاجات مفهمتش منها حاجة
معرفش ايه العهد القديم والعهد الجديد
واسامى ناس كده غريبة
بس فى النهاية والهدف من البوست ده هو انى مستخسرة الصفات الجميلة اللى شفتها فى البنت دى متكونش فى بنات الامة الاسلامية
استخسرت انها تكون فى بنت معتنقة دين غير الاسلام
ولن يقبل الله غير الاسلام دينا
والله اعلى واعلم
فى النهاية
" رضيت بالله ربا وبالاسلام دينا وبمحمد صلى الله عليه وسلم نبيا ورسولا"
بقى احنا ربنا اعطانا نعمة الاسلام
فياريت نحافظ على هذة النعمة ونحمد الله عليها
الحمد لله على ما انعمت علينا به

هناك 21 تعليقًا:

mrmr يقول...

الله خلق ادم وحواء من تراب

الاختلاف فقط فى البشر ونوع التربيه والعقيده
كل واحد اتربى على مهنج وتعليم دين معين

وكل واحد شايف ان دينه هو دين الحق

شئ مش سهل ابدا اقناع الاخر بشئ هو مش مؤمن به

كل شخص بيؤمن بالكتاب الموحى من الله

فالمسلم لا يؤمن غير بالقرأن
والمسيحى لا يؤمن غير بالانجيل

كل شخصي متدين بيعبر عن تعاليم دينه
وبيظهر بمظهر وطباع التعاليم دى

ربنا يهدينا الى الطريق الصحيح
وفى النهايه كلنا نعبد اله واحد
ولا الله الا الله

غير معرف يقول...

وعليكم السلام ورحمة الله وبركاته
الحمد لله رب العالمين على نعمه علينا
رضيت بالله ربا وبالاسلام دينا وبمحمد صلى الله عليه وسلم نبيا ورسولا"
ربنا يهدينا أجمعين
جمعه مباركه

دمتى فى حفظ الرحمن

Ramy يقول...

يا بشمهندزة

لن أطترق لأى شيىء دينى فى الحديث

صدقينى أنا معرفش بنات مسلمات علشان احكم و ادلى برأى

ولا مسيحيات ههههههه

بس اللى اقدر اقوله هى بتبقى البيئة و بعد كدة الدين

و كل دلوق فى الزمن دة ظاهر قدامه كل شيىء و يقدر يختار

علشان كدة ناس كتير بتفتكر الهدوء دة ان الشخص جبان

ربنا معاكى و يوفقك

باحث عن حب يقول...

السلام عليكم
انا عارف انى مقصر من ناحيتك ومن ناحيه مدونتك التى اعشقها بجد بس الظروف حكمت الانقطاع فتره عن مدونتك وليس تعمدا ولكنها الصدف

اولا فى بيت شعر انا بحبه قوى بيقول فيه الشاعر
ومما زادنى فرحا وتيها
وكدت بأخمصى اطأ الثريا
دخولى تحت قولك يا عبادى
وان صيرت احمد لى نبيا
فصلاه وسلاما عليك يا سيدى يارسول الله
بصى بقه
الاسلام موجود فى قلوب العباد فهو دين الفطره التى فطر الله عليها
من قبل ادام حتى الان
بصى
اخواننا المسحيين فيهم صفات رائعه انا بشوفها وبألمسها فى مجال عملى
انا شغال فى مجال المستلزمات الطبيه بجوار دراستى انا نفسى انجح واخلص واكمل فى التجاره وبرضو مش هسيب تخصصى ان شاء الله

عندهم ولا لدينهم جامد ولمن يتلقون منه تعاليم الدين
بجد
اقولك انتى شوفتى فليم حسن ومرقص
فليم رائع اللى قلب فيه المسلم مسيحى والمسيحى مسلم
خلطبيطه بس اقولك
كل منا مطالب بالبحث عن الحق والحقيقه ما دام قد بلغ زى سيدنا سلمان الفارسى كده

انا مش بشمكك فى عقيده اى حد بس البحث مطلوب
فى الاسباب فى كل شىء فى عبادتنا وعلاقتنا بربنا

البشرى بسيدنا محمد فى العهد الجديد والقديم
والطوائف المسيحيه وكده
زى ما قالت مرمر
وكل واحد شايف ان دينه هو دين الحق

بس كده وربنا هو اللى يحاسب
بس احنا مش مطالبين بالمناظره مع حد
اقولك على حاجه كمان
الفقير الى الله ازهرى ودارس لعلوم الدين والحمد لله متعمق فيها بقرأه كتب التراث
بس لا اقدر على مناقشه حد
تعرفى ليه
علشان الايمان لم يثبت بعد
لازم الايمان يكون قوى والقوة تاتى من الحجه والحجه من الاقتناع التام والاقتناع التام من الدراسه المستفيضه
وتلك الدراسه تاتى من ناس متخصصين زى كليه العقيده والفلسفه فى الازهر
وزى كليه الللاهوت عند المسحيين
وممكن سؤال يحير الواحد والشيطان يوسس له لغايه ما يشككه فى دينه وكده انا مش بقول كده انك ناظرتى ولكن
بأقولك موضوع التعرف على الاخر +
ده مقطع من عصير الكتاب لبلال فضل
حاره النصارىhttp://www.youtube.com/watch?v=oMgH-3Omqdo&feature=related
اسف انا مش عارف اوصل اللى عندى
ربنا يهدينا جميعا الى الحق

أتنين حبيبين يقول...

السلام عليكم
كل عام وانتى الى الله اقرب
ويارب يسعدك وتحققى كل ما تتمنى ويبلغك الشهر الكريم على الف خير

الحمد لله على نعمة الاسلام وكفى

فتــافيت (رحاب الخضري) يقول...

كلنا .. اهل الكتب السماوية نعبد إله واحد في سماء واحدة خلقنا في دنيا واحدة

كل واحد حر في معتنقه.. وكل واحد هايتحاسب عليه

زعلت منك في نقطة.. لما قولتي يارب تتحول لمساحيق كاوية؟؟!!!!!!!

ليه بتدعي على حد كده؟؟ ليه ماتقوليش ربنا يهديهم

عارفة لو واحدة مسيحية مكانك كانت قالت.. ربنا يهدي

ههههههههههههه يعني انتي عمالة تنقدي في بنات المسلمين.. وتقومي في النص داعية على حد لمجرد انه بيعمل حاجة مش حلال؟؟؟؟

لو كنت فظا غليظ القلب لانفضوا من حولك.. يعني لازم تدعي بالهداية الاول :)

عرفت مسحيااااات كتير محترمين.. وشوفت بعيني ناس ماتعرفش حاجة عن الاحترام ولا تعرف حاجة عن دينهم ولا بيصلوا ولا بيعترفوا ولا بيتناولوا

وعرفت طبعا مسلمات كتير مش محترمين.. بس كمان عرفت ناس ملايكة في صورة انس.. طاعة ويعبدوا الله حق عبادة

في الاسلام او المسيحية.. فيه كده وكده

الحاجة الوحيدة اللي تلاقيها في المسلمين ومتلاقيهاش في المسيحين.. الشحاتين وبس

ماتزعليش من كلامي :)

على فكرة انا قريت العهد القيدم والجديد وتقريبا انجيل متا كمان.. :)

وفي النهاية يا مقلب القلوب ثبت قلوبنا على الايمان

أحمد الصعيدي يقول...

السلام عليكم

كل سنة وانتي طيبة يا موجة

غير معرف يقول...
أزال المؤلف هذا التعليق.
موجة يقول...

MRMR
______
ربنا يزيدك تقوى يامرمر يا قمر
بصراحة تعليقك عجبنى اوووى وفى النهاية كلنا نعبد الله الواحد القهار
بس انا فى البوست بتاعى كنت بلفت نظر بنات المسلمين انهم مش بيهتمو بتعاليم دينهم
زى بنات المسيحيات

موجة يقول...

الحب الجميل
__________
نورتنيى بتعليقك يا حب
فين تعليق بنوتك الجميله لولو
ربنا يهدينا جميعا لما يحبة ويرضاه
امين

موجة يقول...

RAMY
_______
احييك على تعليقك المسالم ده
وبالفعل هى فى البداية تربية وبيئة
وعمر ما كان الهدوء جبن
ده حتى فى مثل او حكمة بتقول اتقى شر الحليم اذا غضب
معنى كده ان الهدوء مش جبن ولا حاجة ده صفة حلوة اووى اتمنى تكون فيا شخصيا

موجة يقول...

محمود(باحث عن حب)
___________________
ياهلا ياهلا بالناس الغايبة دى ومش بتطلع الا فى الاعياد والمناسبات الرسمية
ومما زادنى فرحا وتيها
وكدت بأخمصى اطأ الثريا
دخولى تحت قولك يا عبادى
وان صيرت احمد لى نبيا
فصلاه وسلاما عليك يا سيدى يارسول الله
صلى الله عليه وسلم
جزاك الله كل خير

الله ينور عليك يا محمود
انا كنت بتكلم عن كده
ان اخواننا المسيحيين عندهم صفات جميله انا مش لاقياها فى المسلمين
زى الولاء للدين وتعاليم دينهم
اما الفيلم
مكدبش عليك مشفتوش
وانا طبعا عمرى ما اقدر ادخل مناظرة مع حد فى الدين خوفا من صدور اى كلمة احاسب عليها وانا لا اقدر عليها
لكن هو كان الفضول
ليه الصفات دى مش فى المسلماااات

موجة يقول...

اتنين حبيبين
_______________
ياهلا ياهلا
فينك ياتوته
مختفية فين
وفين حسام اخبارة ايه
يارب تكونو بخير
كل سنة وانتو طيبين ورمضان كريم عليكو

موجة يقول...

فتافيت
_________
يارب ثبت قلوبنا على الايمان
وطبعا حكاية انى ادعى على حد بيستعمل الحاجات المحرمة ده من شدة غضبى مش اكتر
لكن انتى عندك حق
المفروض اطلب لهم الهداية
عندى دى
لكن موضوع الشحاتين ده بصراحة انا مخدتش بالى منه ومحاولتش اسال اللى بتشحت دى مسلمة ولا مسيحية
نورتينى وشرفتينى بتعليقك

موجة يقول...

احمد الصعيدى
_____________
كل سنة وانت بالف خير وكل دنيتك بخير

موجة يقول...

الحب الجميل
__________
والله ياحب يمكن تكون فتافيت لاحظت حاجة زى دى احنا ما اخدناش بالنا منها
وياريت يافتافيت تبقى تردى على حب
ارضاء لها وانتو الاتنين عندى اخوات وبحبكووو

داليـ ـ ـ ـ ـ ـ ــــا يقول...

هحكيلك قصه بسيطه أصلى أنا حيرانه زيك كده بالظبط
أنا فى شغلى كنت بدى كورس لمجموعه وفجأه لاقيت كل المجموعه مسيحين وعارفين بعضهم بنات وشباب المهم راجعت اسئله يوم الخميس وكان وراهم امتحان السبت فقلى واحد أسمه عازر يابشمهندسه هو أنا لو أحتجت سؤال منك أعمل إيه قلتله بكره الجمعه عيش بقه مع نفسك قام قلى طيب قوليلى إنتى بتصلى الجمعه فى مسجد إيه ,انا أجى أنتظرك أدامه طبعا كان بيهزر معايا
بس أنا بقه أستغربت عارفين كل حاجه عننا
بس أنا مش معاكى مين قلك أنهم مش بيحطوا ميكب ولبسهم خليع جدا
يابنتى أنا وانا بشرح مره ببص لاقيت البت لابسه البضى وأقسم بالله شبه كت وفتحته من عند الرقبه رهيبه وواسعه جدا وكمان خفيف أوى أنا لما كنت ببقا معاهم فى القاعه ببقا بشرح وانا محروجه أصل معانا شباب مكسوفه ليهم سلف ونفسى أجيب حاجه ,اغطيهم
بس الحق يتقال كان بيبقا معانا الشباب المسيحين دول ولا واحد فيهم يرفع عينه فى بنت ويبص ليها نظره مش ولا بد
المهم اخدت بنتين من المسيحين دول كانوا ناقصهم محاضره وودتهم لمجموعة شباب مسلمين
واتفرجى بقه
أول ما دخلوا لاحظت نظره الشباب المسلمين بإنها سورى وحشه ووراها نيه زباله

الفتره اللى عشتها معاهم
كنت هتهبل اجى اقول لماما ازاى ياماما هما مش عارفين أن دينا هو الحق
ليه مش بيأمنوا بسيدنا محمد

يعنى كنت زيك هتهبل

أنا طولت عليكى وعندى أكتر من كده بس كفايه

تحياتى يابت
وحشانى موت

موجة يقول...

داليا
________
حبيبه قلبى
وحشتينى مووووت وغيبتى كتير عليا
ماتغيبيش تانى كده
عشان ما ازعلش منك
المقصود ان البنات المسيحيات لما بيلبسو لبس مغرى مش عندهم حاجة تقول لهم حرام وحلال
لكن عندنا احنا الحلال بين والحرام بين وبالرغم من كده تلاقى الاستهتار بالدين
دومتى بالخير
وكل سنة وانتى طيبة

ويكا يقول...

موجه
كل الاديان السماويه واللى مش سماويه ، حتى ديانات التى تعبد الاصنام ، كلها اجتمعت على الحض على مكارم الاخلاق.
لذا كل من كان متقرب من دينه الذى يعتق ، ستجدينه ذو خلق.

الا ان فضل الله علينا عظيم ، لان كل ما دون الاسلام فهو مردود.
ولن يقبل الله الا الاسلام، ولعدل الله فى ذلك انه لم يحتكر الاسلام على احد ، ولم يمنع احد من دخوله ، ومكن للمسلمين من فتح الارض من مشارقها لمغاربها ، حتى يوصلوا الرساله وحتى لا يتحجج احد بعدم وصولها اليه.
فهذا دين الله الذى ارتضى ، فمن اراد اتباع ما انزل الله فهو فى جنة الخلد باذن الله ، ومن رغب عنه ، فلا مسوى له الا النار.

واعلمى ، كما قلتى ، ان اولى الناس بحسن الخلق هم المسلمين ، لذا لندعوا الله ان يحسن خلقنا كما حسن خلقتنا.

واعلمى ايضاً ان اقرب الناس واشدهم تمسكاً بدينهم(دون الاسلام اقصد) هم اقرب الناس للدخول فى الاسلام.

لمعرفتهم بالحق ، ومبادئ الاديان الصحيحه.
لذلك تجدى فى القران الكريم قول الله تعالى :
"وَلَتَجِدَنَّ أَقْرَبَهُمْ مَوَدَّةً لِلَّذِينَ آمَنُوا الَّذِينَ قَالُوا إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَانًا وَأَنَّهُمْ لَا يَسْتَكْبِرُونَ(82)وَإِذَا سَمِعُوا مَا أُنْزِلَ إِلَى الرَّسُولِ تَرَى أَعْيُنَهُمْ تَفِيضُ مِنَ الدَّمْعِ مِمَّا عَرَفُوا مِنَ الْحَقِّ يَقُولُونَ رَبَّنَا آمَنَّا فَاكْتُبْنَا مَعَ الشَّاهِدِينَ(83)"

ده ليه لانهم عرفوا الحق وقريبين منه ، فاتبعوه.

لذا ادعوكى ان تدعوا زميلتك هذه الى الاسلام لعل الله يجعلكى سبباً لهجايتها ونجاتها.

لكن احذرى كل الحذر ان تتصدرى للفتوى او للسماع منها حتى ان كنتى لا تمتلكى الحصيله الاساسيه على الاقل لان تأمنى فتنتك انتى.


دمتى بخير

غير معرف يقول...

ازيك

التميز المثالي للخدمات المنزلية يقول...


شركة تاج للتنظيف بالدمام 0551844053


شركة مكافحة حشرات بالدمام

شركة رش مبيدات بالدمام

شركة تنظيف بالدمام


شركة تنظيف شقق بالدمام


شركة تنظيف فلل بالدمام


شركة رش مبيدات بالخبر


شركة مكافحة حشرات بالخبر



شركة تنظيف شقق بالخبر


شركة تنظيف سجاد بالدمام


شركة مكافحة حشرات بالاحساء

شركة مكافحة النمل الابيض بالاحساء


شركة مكافحة حشرات بالجبيل

شركة مكافحة النمل الابيض بالجبيل


شركة تنظيف منازل بالجبيل

شركة رش دفان بالدمام

شركة مكافحة النمل الابيض بالدمام