انا بهنينى

كل سنة وانتى طيبة ياعبير

بما ان لسة محدش قالهالى يمكن مستنيين لما يوم24/6 ييجى ويقولوها

ويمكن يكونو ناسيين

بس انا فاكرانى يا انا

وبكرة هجيب لى تورتة وجاتوة وبلالين وهفرحك

موجة

طالع بمنظرين

ايه ياخوانا

فاكرين لما كنا صغيرين وكنا بنسمع افلام لاسماعيل ياسين مثلا وكان يبقى طالع بدورين

زى فيلم اسماعيل ياسين فى الطيران

كان طالع بدور سماعين وحسين

نفس الشكل بالضبط بس باختلاف الاسامى

كنت فى وقت من ذات الاوقات فى ساعة مش متاخرة من الليل

قاعدة فى امانة الله وكنت بقرا بوست لاخونا سووووووو صاحب مدونة عجوز وعندى تلاتين

وده لانى لما بحب اضحك بخش اقرا عنده واضحك واطلع

عادى يعنى

مفيش مشاكل

ام هند بقى

بعد ما خلصت البوست فى امانة الله وضحكت برضو فى امانة الله وكركعت م الضحك شوية وبعد كده هديت وفهمت المقصود م البوست

اذ بيا عاوزة اكتب تعليق ع البوست

شئ عادى يعنى

عادى جدا ان حد يكتب تعليق ع البوست ولا ايه؟

اخش واذ بيا متنحة لمده لا تقل عن

خماشر عشين تلاتين ثانية كده

والاقينى كاتبة تعليق اساسا اصلا

كاتبة اول تعليق كمان

طب ازاااااااااااااااااااااااااى

ازاااااااااااااااااااى

ياناس حد يطسنى بشوية ميه فى وشى ولا فى افايا يمكن افوق

طب ادعك فى عنيا كده يمكن مزغللة شويه ولا حاجة

برضك مفيش

كاتبه تعليق يعنى كاتبة تعليق

تستاهل التتنيح ولا متستاهلش

قلت ما يمكن انا طالعة بمنظرين ولا حاجة

فين وفييييييييييييييييييييين

على ما فهمت بعد ما قريت تعليقى اللى انا كاتبااااااااه

ان فى كمان موجة فى التدوين غيرى

اه والنعمة

فى موجة تانية غيرى

بس فى اختلاااااااااااااف كبير جدا

موجة اللى هى مش انا دى

تبقى ذكر

اه والنعمة

ذكر شوفت فى ملف التعريف بتاعه مكتوب ذكر

وانا الحمد لله انثىىىىىىىىىى والنعمة كمان مرة انثى

وكمان صورته غير صورتى واسم مدونته غير اسم مدونتى

بس قررت ادخل عندة اعرفة بقى انه انا مش انا

وعاوزين نوصل لمعاهدة صلح بينا او نعقد اتفاقية سلام

بحيث ان يغير اسمه او كده بقى

بصو هنعقد اتفاقية بس افكر فى بنودها واعرضها وانشاء الله نوصل لحل وسط يرضى جميع الاطراف

ويبقى الحال كما هو عليه وعلى المتضرر الخروج من البلوجرززززززز

عندى حاله ملل

معلش ع الغياب بس بجد احساس بالملل فظيع

مسيطر عليا جدا

ومش حاسة انى عاوزة اعمل اى حاجة فى حياتى ولا اتقدم اى خطوة لاى اتجاه

بجد مش عاوزة حاجة ولا عاوزة حد ولا عاوزة غير انى ابعد عن الناس وعن نفسى وعن الكل وابعد بعيد بعيد لحد ما افوق

حاسة انى فى غيبوبة بجد

بس طبعا لان كتير سالووو عليا واستغربو غيابى قلت اطمن الناس بقى انى لسة عايشة الحمد لله وكمان خلصت نفسى م الورطة الاخرانية "الخطوبه"

ال اتخطب ال

هع هع هعع هع هع هع هع هع هع

بس فى مشكلة متمشكلة بستين الف مشكله

كل ما اخلص من حد يجى اللى بعده كاننا فى طابور عيش مثلا

ماعلينا

كل واحد هياخد اللى فيه النصيب ويتقلب زى اللى قبلة

نياااااهاهاهاهاها شريررررررررررة

طبعا فى ناس الفضول ماليها عايزين يعرفو طفشت المحروس ازااااااااااى

عادى جدا جدا قابلتة مرة وعرفت اللى بيفكر فيه وعملت عكسه وبقى لما يجى اروح داخلة نايمة عشان عندى شغل وبتاع وبدات اتنك على امة واخواتة وحركات ارعة من دى

وفى شويه مواقف كوميديه هقولكو عليها

بس مش وقتة بقى

انا جيت اطمن الناس

ومتزعلوش انى مردتش على تعليقات فى البوست اللى فات

بس بجد مش قصدى حد

هى ظروووووف

مخبوطة

اتخطبت

وبس

محدش يقول مبروك

...........................

ورقة وقلم وكباية شاى

ياااااااااااه

بقالى كتير نفسى اقعد مع نفسى

واجيب ورقة وقلم وكباية شاى

من ساعة ما اتخرجت مقعدتش مع نفسى ولا مسكت ورقة ولا قلم ولا قعدت بكباية شاى

نفسى احاسب نفسى وارتب افكارى واشوف انا عاوزة ايه

مين ابعد عنة ومين اسيبة ؟

مين اخسرة وما ابكيش علية ومين اكسبة واجيبه ؟

ايه الحاجات الغلط فى حياتى وليه بعملها

وليه عارفة الغلط ومصممة عليه

وليه بعاند فى نفسى وبتعب نفسى بنفسى

ليه مش بدور ع اللى يسعدنى ليه بدور ع اللى يوجع لى قلبى

ليه رافضة الجواز لحد دلوقتى وليه خايفة منه

ولحد امتى هفضل مقضاياها شغل وبس ولامتى هعيش حياتى فى صمت

كم واحد عرفنى من جوه

كم واحد خايفة اخسره

وكم واحد عاوزة ما اعرفوش تانى

ليه بتحصلى مواقف كتير وحشة

وليه بتعامل مع الناس بطريقة انا مش راضية عنها

وليه فكرتى عن الرجالة انهم كلهم خاينين وكلهم بحبو يوضحو ان الستات ادامهم ضعفانين

امتى ربنا ياخد بايدى وارجع راضية عن تصرفاتى من تانى

وامتى بقى احس انى مستقرة فى حياتى

وايه اللى ناقصنى عشان اكون انا

مكونش حد تانى

مش عارفة بقى

زهقت وخلاص

مبقاش عندى ثقة بالناس

وحتى ثقتى فى نفسى فقدتها من زمان

مبقاش عندى حاجة اخاف عليها ولا حاجة اهتم بيها

حياتى بقت صفحة بيضة فى كتاب ومفيهاش اى الوان

رخمت اوى انا عارفة البوست ده

بس انا بديكو فكرة انى ممكن ابعد شويه لحد ما اقرر انا هعمل ايه ولا هيجرالى ايه