الأربعاء، 30 مارس 2011

بطحته بلاش قتلته


لكل المعلقين على الموضوع اللى فات
بس بجد
بجد هو اللى استفذنى اووووى

الموضوع مكنش واضح بالنسبالكم
وانا قصدت عدم التوضيح عشان اشوف ردود الافعال بتاعت اصدقاءى المدونين

الموضوع وما فيه 
انى كنت ماشية فى يوم  فى الشارع راجعة م الشغل زى كل يوم  وواحد صايع فضل ماشى ورايا بيعاكسنى

رحت منفضاله
لاقيته وقف جمبى
رحت باصة الناحية التانية

لاقيته بيعاكس بقى ويقول كلام مش لطيف

رحت ماسكة قالب طوب كبييييييييييييييييييييير كبير اوووى

ورحت مدياه فى وش امه

فاتعور

شفت انا منظر الدم اتخضيت

رحت شاتماه وقايلاله ابقى احترم نفسك احسن
راح غار فى داهيه

فقررت بقى انى بعد كده اى حد هيستفزنى هناوله باى حاجة فى وشة
او ممكن بعد كده امشى بمطوه فى جمبى

او اشترى جهاز مانع التحرش
او اعمل اى حاجة فى اخرها اشوف منظر دم اللى بيعمل كده
بجد كانت متعة وانا شايفة منظر الدم على وش الراجل ده

عشان كده انا قتلت جوايا براءة وقتلت جوايا طيبة وقتلت جوايا كسوف واحراج
واتولد جوايا حب انتقام 
وبقيت بحب اللون الاحمر اووووى عشان لون الدم
وبقيت اكره اللون الابيض
عشان بيدل على النقاء اللى انا حاليا بسميه هبل

معلش لو فهمتو غلط بكلماتى فى البوست القديم
ومعلشى على موجه اللى بقيت وسطكو وهى جواها كده
بس كده احسن

الأحد، 27 مارس 2011

قتلته.....



هو اللى جابه لنفسه
هو اللى يستاهل
واكتر من كده كمان
ولو رجع بيا الوقت
كنت اتفننت فى رسم دمه وتوزيع لحمه
واى حد يبقى زيه هيبقى جزاءه اسود منه

الخميس، 24 مارس 2011

الانسان والكوباية


النسبة بين الانسان والكوباية
احنا بنشرب فى كوباية بمكن لو كانت كبيره هتبقى طولها 15 سم وقطرها 7 سم
يعنى نسبة حجمها لحجمنا تقريبا فى حجم كفة الايد
طيب
عمر حد تخيل ولا فكر لو فى عملاق جه دخل البلاد هيبقى شكل الحياه  ازاى 
ولا حد تخيل ايام زمان كان الانسان عملاق اكتر وكان بنيان جسمه اقوى

طب العمالقة دووول بيعيشو  ازاى

ده اللى انا تخيلته


 العمالقة محتاجين يشربو فى ايه

حله غسالة عادية مثلا

او ممكن برميل من اللى بيعملو فيه الخرسانة

النسبة بين حجم الكوباية والبنى ادم ممكن تساوى  النسبة بين ماسورة قطرها 10 متر وطولها 25 متر "زى مواسير المجارى بس مقلوبة لفوق) وبين طول العملاق

وياسلام لما تشوف نفسك جمب الماسورة دى اد الفار 
وفجأة
تلاقى الماسورة الضخمة دى حد شايلها زى ماحنا بنشيل الكوباية
طب احنا هنبقى اد ايه بالنسبة ليهم

هنبقى اد النمله مثلا
؟؟؟؟؟؟؟؟

والطيارات بقى الكبيرة اوووى دى تبقى زى الناموسة العملاق يهشها من على وشه هش زى الناموس
ياااااااااااااه

واحنا بقى هنكون خدامين وعبيد عند العمالقة بنطبخ لهم فى حلل كبيرة زى حلة المية بتاعت شركة مياه الشرب كده

ويجى العملاق ينام بقى ياسلام لما ييجى ينام
يمدد رجله من بولاق لحد المنوفيه

تعالو بقى لو حب العملاق يستحمى
ده ممكن يغطس فى البحر الابيض بتاعنا كانة بيغطس فى بيسين عمقه 3 متر

الحياه هتبقى صعبة اوووى
هنمووووت اكيد عشان مش هنلاقى كوبايات على ادنا
هتبقى كوبايات كبيرة اوووى نيجى نشرب نغرق فيها ومانقبش

يلا بقى

الخيال ده جالى بسبب السندباد

كنت بتفرج ع كرتون السندباد وشوفت العملاق شايلة من القميص بتاعة زى ما يكون شايل فار مسلوخ والسندباد عمال يرفص ويصوت
والعملاق ولا سامعة اصلا

معذرة لسندباد التدوين القصد مش عليك  خالص

ده تهييس
ياتهيس معانا يا تهييسس لوحدك
المهم انك هتهيس
عادى تخاريف موجه

الجمعة، 18 مارس 2011

شوفووو الفرق


البنت .... رقة ..... وعذوبة ..... وجمال ..... واتيكيت ..... وحنان
شوفو الفرق بين كده وبين
الولد ..... خشونة ..... تكشير .... عجرفة ..... وقسوة
الفرق ده بيظهر حتى فى طريقة الاكل

هو صحيح الاكل عورة لابد ان تستر وده عن حديث نبوى شريف
" الاكل والنوم عورتان فاسترهما "
بس البنت تحب تبص لها وهى بتاكل اما الولد ............... يععععععععععع
:)




نشوف ازاى بتأكل البنت




1-تغسل ايديها بصابون لوكس.. وتنشف بكلينكس...ده قبل الأكل طبعاً.

2-تمشي بخطوات هادئه لحد ما توصل للسفرة .

3- تزحزح الكرسي ورا بكل رقه وتقعد عليه بحنان ... وإذا كانت قعده عربي..تقعد على السفرة كالحورية..
يعني تثني رجليها لليسار وكنها بتطيح على جنبها...

4-تمسك الملعقة بهدوء... تبص ليها كويس عشان تتأكد أنها... بتبرق بتلمع .

5- تقول بصوت ناعم    "بسم  الله"

6-تبدأ بأكل السلطة حتى تفتح شهيتها.

7-تغرف الرز بالملعقه بحيث لايتجاوز عدد الرزات التي شالتها المعلقة 17حبة بس .
ما تسالونيش اشمعنى 17
عديتيهم يعنى يا عبير
اه طبعا مش بنت وباكل زى البنات
:)
نكمل

8-تمضغ الاكل كويس من غير أي صوت.

9- لما تخلص اكل تحط الملعقة جانباً... وتقول     "  الحمد لله "

10-تقوم بنفس الهدوء الذي قعدت بيه  ...  وتروح تغسل فمها وتتعطر علشان
تروح ريحة الزفاره...

نشوف دلوقتى بقى الشباب 



1-يصحى من النوم رايح فى وشه علطول ع  السفرة مباشرة وهو مشمر دراعينه .

2-يقعد على السفره وكأنه وقع من السماء    " زى نيزك".

3-يدخل ايده كلها في طبق الرز وسايب بين كل صباع والثاني
مسافة 2سم.

4-يخرج ايده بعنف من الطبق.....إنتم عارفين بقى ازاى يطلعها.

5-يرمي باللقمة الى بقه المفتوح 15سم.

6-يمضغ الرز بطريقة تجعلك تقول................يع.....

7-يأكل السلطة بعدما يقضي على الرز واللحمة.

8-يقوم بسرعة الصاروخ وفي ايده علبة سفن أب أو بيبسي      " أهم شئ يشرب"

9-يظهر صوتاً بشعاَ جداً .

10- يمسح يده في ثوبه..مخلفاً ورائه دمار شامل..

.........................
لكم الحكم فى الفرق

الأربعاء، 9 مارس 2011

الزواج عام 2020




تقدر تتخيل الجواز بعد 10 سنين او اكتر هيكون ازاى

 كل واحد فينا هيتخيّل حاجة مختلفة عن التاني، 
وبصراحة كده ده تخيل واحد ضحكنى وقلت انقلهولكو 
تخيّل الزواج عام 2020.. يمكن يكون كده ويمكن لأ..

بيرن جرس الباب يروح صاحب البيت يفتح يلاقي الجماعة جايين على الموعد بالظبط،
الجماعة اللي همّ الشاب واسمه “سمير” وإمه وأبوه، جايين يخطبوا البنت واسمها “سارة
… بيرحّب بيهم أبو سارة، وبعد السلام والكلام ومرحبا فيكم وكيف الحال، وبدور الحوار التالي:
 **************************************************************
أبو سارة: ها يا سمير،  بتشتغل ايه يابنى ؟
سمير: انا بشتغل في مجال الانترنت.

أبو سارة: مُبرمج يعني؟ ما شاء الله.. ممتاز.
سمير: لا يا عمّي انا مش مبرمج.

أبو سارة: أكيد مُصمّم غرافيك بقى .. المجال ده له مستقبل كبير.
سمير: لا عمّي انا حاليا مشرف منتدى الأغاني في موقع “كراكيب دوت كوم” وقريباً هأمسك إشراف منتدى المسلسلات التركية في موقع “سلامتك من الهسهس دوت نت”.

أبو سارة: مشرف ازاى يعني؟
سمير: يعني انا بضيف مواضيع وبحط أغاني وبعمل اشتراكات بأسماء وهمية عشان أحرّك المنتدى وكده يعني.

أبو سارة: والله منا فاهم حاجة ..  يعني بيدفعولك اد ايه فى  الشهر في الشغل ده ؟
سمير: لا يا عمّي أنا اللي بدفع لصاحب المنتدى عشان اكون مشرف.. بس قريباً هافتتح المنتدى الخاص بتاعي.

أبو سارة: ومنتداك الخاص هيكون مكتبه فين ؟
سمير: حالياً من البيت ولما الله يفتحها علينا بستأجرله مكتب.

أبو سارة: المنتدى ده هتستفيد منّه فى ايه ؟
سمير: ازاى  هأستفيد منّه ؟ ده سؤال ياعمى..؟!.. انا هأفتح المنتدى وأحط فيه برامج ومسلسلات وألعاب والأعضاء هيشتركوا فيه ويبقى منتدى مشهور جداً.

أبو سارة: يعني العضو هيدفع كم اشتراك؟
سمير: لا يا عمّي.. العضو مش هيدفع اشتراك.. أنا هدفعله عشان يشترك.

أبو سارة: لا حول ولا قوة إلا بالله.. يعني مصدر رزقك منين يا بنى ؟
سمير: لمّا يكبر المنتدى وأنشره على فيس بوك راح تيجيني إعلانات بالهبل.

أبو سارة: والله منا فاهم حاجة .. طيب انتا محوّش كم؟
سمير: أنا يا عمّي ومش عايز أخبّي عليك، عندي حاليا 99 دولار في Google Adsense ووعدوني يبعتولي الشيك بعد شهرين وده هيكون وضعي المادي ممتاز، حتى اذا عايز بجيبلك براءة ذمة من Paypal.عشان تتاكد 


أبو سارة: يارب عدى الليلة دى على خير بس.. طيب انتا عرفت سارة بنتي منين ؟
سمير: تعرفت على سوسو بالـ Facebook، وكنا نبعت مسجات ونعمل لبعض poke أحيانا..

أبو سارة: ويعني معرفة النت بتكفي انك تيجي تخطبها؟
سمير: آآآه يا عمّي.. ما انتا مش عارف.. انا جبت 80% في الـ quiz بتاع سوسو.

أبو سارة: وايه هو الـ كويز ده ؟
سمير: معقول يا عمي ما تعرفش كويز Do you know me? على Facebook؟

أبو سارة: لا معرفوش.. وبعدين مين سوسو دى ؟
سمير: يا الله يا عمي.. معقول كمان ما تعرفش ان سارة اسمها سوسو على Facebook؟

أبو سارة: لا معرفش انو سارة اسمها زفت.
سمير (بكل بُرود): انتا زعلت يا عمي؟

أبو سارة (بعصبية): تعرف لو فضلت قدامي كمان 10 ثواني انا هعمل فيك ايه ؟
سمير (بإبتسامة غبية): أكيد هتضيفني على facebook وتكتبلي على الـ wall بتاعي، صح؟ :lol:
أبو سارة: براااااااااااااااا.
طبعا أبو سمير وإمّه اتكسفو من ابنهم ومشيو بعد أول سؤالين

الاثنين، 7 مارس 2011

3عادات سيئة للنساء


الإلحاح الدائم.

وهى دى أول عادة سيئة بيصوت منها  كل الرجاله.
مافيش مشكلة أنك تفكريه بحاجة مهمة أو عمل 

ولكن 

لا تكونى مزعجة طوال اليوم، لأنه اكيد سمعك أول مرة ولكن ممكن ماجاش  الوقت المناسب للرد او لعمل الشئ .

الرجاله ما بيحبوش أن يتابعهم حد بالطلبات وخاصة بأسلوب الالحاح  اللي بتتبعه الكثير من السيدات. 

لتستعيدي حبه واحترامه وثقته بك توقفي عن عادة اللالحاح الدائم.

محاولة التغير.

احسن طريقة للمحبة الصادقة هي قبول الشخص كما هو وليس كما تحبينه أن يكون.

عادى ممكن  تقدمى النصائح أو توجهيه لحاجات معينة،

لكن 

ما تحاوليش انك  تحطيه فى قالب خاص وتعملى منه نسخة منك أو نسخة من رؤيتك المثالية.

محاصرته.

ممكن تكونى متعلقة بيه لدرجة أنك مابتقدريش تسيبيه يروح بعيد عن عينيك

أو دايما تحاولى  حشر نفسك في خططه،
اكيد هيشعر بالانزعاج.
سيبيله مساحة من الحرية الشخصية لتبقى العلاقة صحية. 

المحاصرة في المنزل وخارج المنزل ممكن تسبب لك مشاكل في علاقتك به.

اذا لكل السيدات
ابتعدو عن

الالحاح 

محاولة التغيير

المحاصرة