الجمعة، 6 نوفمبر 2009

ومـــــــــــــالــــــه



كلمة السر


لما الراجل يرجع من الشغل طهقان زهقان مدايق من رئيسه فى الشغل اللى مطلع عينة ومستعبده فى شغلة ومبعطر كرامتة
تيجى مراتة تطبطب على كتفة وتقوله:
وماله ياراجل كلنا خدامين لقمة العيش واما كنتش تعمل كدة غيرك هيوافق يعمل كدة وياخد مطرحك فى الشغل احنا وعيالك اولى ياخويا استحمل شويه ياراجل انت خرع كده ليه


لما الولد يرجع من المدرسة بيعيط ويجي يشتكى لامة ويقولها الاستاذ ضربنى على ضهر ايدى بحرف المسطرة عشان مدفعتش فلوس المجموعة وطردنى وشتمنى بابويا
امة تقولة:
وماله يابنى مهو بيضربك عشان يعلمك ايوة امال ايه بيعلمك ياحبيبى ومع كدة متزعلش عشان شتمك بابوك ماهو ابوك ياما بيشتم


لما البنت تروح تقعد مع جدتها وتحكيلها على الشباب اللى كانو بيعاكسوها وهى جايه لها و اد ايه كانو سفلة وقلالات الادب
تقولها جدتها:
وماله ياختى يمكن واحد فيهم يعجب بيكى ويجى يخطبك من ابوكى اه ماهو الجواز سترة للبنت وهو ده حلمى انى اشوفك عروسة قبل ما اموت


لما الست ترجع لجوزها من الشغل وتقوله المدير كان بيبصبص لى وانا بالشكل ده هقدم استقالتى انا مش هستحمل قلة ادبه دى يغور الشهد من وش القرد مش هشتغل يا سيدى بقى
جوزها يرد عليها ويقولها:
وماله ياحبيبتى ماهو اكيد معجب بشغلك وعشان كدة يمكن يزود مرتبك ويديكى حوافز وبدلات اوعى تستقيلى انا بقولك اهو المصاريف كتير والعربية مافيهاش بنزين والموبيل لازم نحوله لخط وقسط الشاليه اللى فى الساحل الشمالى لسه ماندفعش


لما عمرو دياب بذات نفسة يحب يرقص سلو مع مزة حلوة لازم طبعا يغريها ويغنيلها وماله


وماله وماله وماله


انا نفسى اعرف فين ماله ده اللى بيخلى ناس كتير تتنازل عن كرامتها وترضى بالاهانه
وكل واحد بيسمع وماله دى كانه اخد حباية كيتوفان بينسى الاهانة وينسى اللى كان بيشتكى منه ويرجع يستسلم للى كان فيه عشان ماله
هل اللى بيسمع وماله دى بيستسلم عشان هو عايز يستسلم ولا بينسى عشان وماله دى هى كلمة السر السحرية؟؟

هناك 11 تعليقًا:

الشاعر الحزين يقول...

أووووووووووووووووووووول تعليق


ألف مبروك عليا أول تعليق


أروح أقرأ بقى وأجى

الشاعر الحزين يقول...

تصفيق حاااااااااااااااااااااااد يا موجه

والله بجد موضوع فى منتهى الجمال

وطبعا عندك حق فى كل كلمه قولتيها

وماله هى فعلا كلمة السر أو بمعنى أصح المخدر اللى بنحاول نغطى وراه جرح الكرامه

للأسف الكرامه بقيت رخيصه قوى اليومين دول

بجد موضوعك فى منتهى الجمال يا موجه

أيوه كده ارجعى ونورى مدونتك من تانى

دمتى بالخير

momken يقول...

ازيك يا موجه

شوفى ياستى
هناك تلت معاول هدم فى لغتنا الجميله

وماله___ وايه يعنى ____ عادى__

وبعدين يجى بعدهم فى المقام التانى


معلش ____ وعيب عليك ____ وياراجل ___ويا شيخه___

دى شويه مفردات فى كلمنا بدعنها نحن وماجعل الله بها من سلطان

كلها لتفويت الفرص وفض المجالص وانها النقاش لصالح القائل رغم ان الحق مع الاخر

سيدتى كلا منا يصادف هذه المواقف على الاقل مره
فان عاد لاخذ رائى نفس الشخص مره اخره فهو قد ادمن الاهانه والبهدله والهوان لكنه يبحث من مضاد حيوى لمشاعره
ومسكن لكرامته التى اهدرت

بوستك حلو وطريقتك عجبانى


تحياتى

أبو العريف يقول...

ولما موجه تكتب بوست زي ده

لازم نقول وماله

ماهي دي عادتها

تغيب تغيب

وتيجي تعمل بوست وتجري

بوست مميز كالعاده

تسلمي

موجة يقول...

الشاعر الحزين
______________
ميرسى يا علاء على كلامك الجميل ده اللى اتعودت عليه منك كتير بتجاملبنى وبترفع من روحى المعنوية

موجة يقول...

momken
________
اخيرا ياراجل نطقت بحاجة حلوة توزن النفوخ كدة
بدل ما كل مرة تدخل شمال لحد ما ورمت لى رجلى

موجة يقول...

ابو العريف
____________
اشكرك يا تخاريف على تعليقك اللىلا بيغيب يغيب واسال عليك مش كده ياعم الحج

momken يقول...

شكراً

momken يقول...

انتى فين من زماااان

والف سلامه على رجل حضرتك


ان كنت اثقلت قدديما فربما كان عشم

وعلى العموم حصل خير


تحياتى

الشاعر الحزين يقول...

موجة



معقول ؟؟؟ لا مش معقول

معقووووووووووووووول ؟؟؟ لا مش معقول

بجد مش مصدق

موجه ؟؟؟

ياااااااااااااااااااااااااه حمدا لله على السلامه يا عم الحاج

دا أنتى بقيتى عامله زى العيد مبيجيش غير مرتين فى السنه ايه الغيبه الطويله دى كلها ؟؟

وياترى أنتى جايه كده تسلمى وتمشى تانى ولا هتحنى علينا تقعدى معانا شويه ؟؟

بجد والله يا موجه مينفعش الغياب ده كله التدوين بجد كل يوم والتانى بيضعف بغياب المتميزين

ياريت تفكرى فى كلامى ده كويس وترجعى بقى ها ارجعى وبلاش لعب عيال

ياللا سلام


على فكره

ده ردى على تعليقك عندى يمكن لما تشوفيه تعملى بيه

صباح الفل

Maha Shahen يقول...

ممكن يستسلم لقلة الحيله او للظروف
ليه ليه يستسلم لو فى بديل
الرزق مبيقفش علي حد معين دا ربنا سبحانه وتعالى الرازق
محدش من بنى ادم يقدر يتحكم فى حياه حد ربنا سبحانه وتعالى بس اللى يكتب علينا مين يعيش ومين يموت
ولو اجتمع العالم كله علي ان يضرك بشيئا لن يضرك الا بأذن الله
ليه بقى نستسلم للاهانه والظلم ونقول وماله
بس فى حاجات كتيره من اللي كتبتيها مظبوطه وصور بنقابلها وصور تانيه مستحيل نشوفها الا لو الانسان اهدر كرامته وعاش مشترى الدنيا بالاهانه والذل
خالص تحياتى ليكى