اتنين عبط....واتنين بيستعبطو...

اتنين عبط
نعرف قصتهم
خير اللهم اجعلة خير
اختى وصاحبتها هم الابطال
ال ايه العيال خارجين من الجامعة عشان يفطرو
وطلبت معاهم يتمشو ع الكورنيش اللى قدام الجامعة

مش كدة وبس
شوفو العبط

وكمان مش يتمشو لاء ويقعدو ياكلو كمان ع الكورنيش
وعاديكو ع اللى يجرالهم
البنات قاعدين بياكلو فى امان الله وال ايه
اذ فجأتن
يلاقو رجلين سنهم يعنى فى سن والدى مع حفظ المقامات طبعا
ايش جاب لجااااااااااااااب
الرجلين دول بقى يجيو متسندين على بعض ويدور الحوار بقى
احد الرجلين:"ممكن بس استاذنكو يابنات تقعدو الراجل ده جمبكو احسن ده تعبان"
البنات:"اتفضل ياعموو.....الف سلامة عليه ياعموو"

احد الرجلين:"انتو اد بناتى"
البنات:"طبعا ياعموو"
احد الرجلين"احنا اصلا عندنا محل فية حاجات حريمى هتعجبكو اوى.............."
وقعدو يحكو بقى على قصة حياتهم ويتكلمو والبنات بيسمعو
مش بقولكم عبط وبيستعبطووو
البنات عمالين يسمعو ويضحكو فى الخباثة ويتغمزو
طب يابنت ياهبلة انتى وهية
متقومو من جمبهم وامشو روحو فى حتة تانية
وانت ياعم انت وهو
بتحكو لمين وعاوزين منهم ايه
مش هم اد بناتك برضو
طب لما هم اد بناتك يا عم بتحكى معاهم فى قصة حياتك لية هم مالهم
واخرت المتمة ال ايه يقولهم
احد الرجلين"لما تيجو عندنا المحل ليكو عندنا شنطة هدية"
"ولو وافقتو انكو تيجو معانا احنا ممكن نوقف تاكسى دلوقتى ونروح هناك عشان تتفرجو على الحاجات هناك"
هههههههههههههههه
اد بناتة برضو مش كدة
وال بعدها برضو البنات بيردو يقولو ايه"لاء شكرا ياعمو"
مش ياخدوهم المين ولا حتى يشتموهم ولا يقومو ويمشو ويسيبوهم
لاء برضو قاعدين
ااااااااااااااااااااه يانارى منهم
وشوفو اللى جاى استنو متستعجلوش
احد الرجلين"ممكن ارقام تليفوناتكو بقى احنا بقينا اصحاب مش كدة يابنات"
البنات:"ايوة طبعا ياعمو بقينا اصحاب"
احد الرجلين:"لاء بلاش عمو دى انا اسمى دعبس"
الرجل التانى:"وانا اسمى حمبوزو"
طب ياعم حمبوزو مش بيقولو برضو ان عم حمبوزو بيفضل فى كوزو لحد ما نعوزو ايه اللى جابك هنا بقى
البنات "ايوة ايوة....اهلا وسهلا ياعمو"
ويروحو ايه البنات يفتكرو نفسهم ناصحين ويعطوهم رقم تليفون غلط
هههههههههههههههه
فكرة اصلا انكو تديهم رقم التليفون من البداية غلط
وفكرة انكو توافقو تتكلمو مع الناس دول برضو غلط
المهم خالينا معاهم للنهاية
احد الرجلين يكتب رقم التليفون ويرن على الرقم
"تررررن تررررن....الووووووو"
"ايه ده ده مش رقم حد فيكو ده صوت راجل بيرد"
البنات بتضحك بقى وبيقولو:"لاء ياعمو اصلى اتلخبطت"
يالهوتىىىىىىىىىىى ع العبط المستحكم
وتقوم تديلة رقم تانى برضو غلط بس من حسن حظهم ان الرقم كان غير متاح
راحو قايلين"اصل الخط ده مش شغال دلوقتى ياعموو"
يخرب عقولكم
طبعا انا بسمع الحكاية من اختى وعاملة نفسى هااااااااااااادية
عشان اجيب اخر الحكاية واعرف اللى حصل كلة
مجرد ماختى خلصت حكى
عنيكو ماتشوف الا النور
انا"بت انتى....انتى بستهبلى ولا ايه."
"ازاى اصلا تتكلمو معاهم كل ده وازاى توصل بيكم قلة العقل انكو تقعدو وتتسايرو لحد ما يطلب رقم التليفون"
اختى:"وانا اعمل ايه يعنى ... اتنين بيكلمو ... اعمل ايه انا.. بسمع.."
انا:"بسمع؟؟؟.....سمعتو الرعد فى ودانكو انتى وصحبتك"
"انتى يابت اللى حصل ده غلط وميتكررش تانى"
"اى حد يحاول يكلمك وانتى متعرفيهوش حاجة من الاتنين تعمليها"
"يا اما تاخدية بالالم على خلقتة وتصوتى وتلمى الناس عليكى"
"يا اما مترديش وتمشى فى وشك علطول"
" ايه الاستعباط ده بتاعكو انتو الاتنين"
"منك لله انتى وصحبتك.. رفعتولى الضغط"
اختى:"خلاص بقى انتى هتسيحى لى.. اسكتى عشان ماما متسمعش"
وفعلا ماما سمعت وجت تسال فى ايه
رحت قايلالها " ابدا اصلها قطعت الشنطة بتاعتى وشنطتى جديدة ياماما وواخداها هدية من محل حلو اوى ياماما"
ههههههههههههههههههههه
طبعا برمى كلام على العبيطة اختى
شوفتو بقى ياحضرات الدنيا جرا فيها ايه
طبعا ده مثال بسيط اوى اوى من بلاوى الدنيا اللى بتحصل
وطبعا اللى يعيش ياما يشوف واللى يمشى يشوف اكتر
ربنا يسترها على البنات كلهم يارب
وربنا يهد الناس اللى معندهمش ضمير ولا دين
ربنا يمسحهم من على وش الارض عشان الدنيا تنضف بقى